ATAÚRU, 14 marsu 2025 (TATOLI) – Moras Infesaun vias respiratória ka ISPA, diareia ba labarik no moras kulit (dermatolojia) mak moras ne’ebé rejistadu iha Ospitál referál Atáuru. Maske nune’e, tratamentu ba populasaun sira la’o normal hela.
“Mudansa ba klima provoka moras diareia no moras kulit ba populasaun Atáuru, maske iha illa ida maibé atendimentu la’o di’ak no daudaun ne’e stock ai-moruk iha %11’’, Diretór Servisu Autoridade Administrativa Atáuru, Dano Pires de Sousa, informa, iha nia knaar-fatin, sesta ne’e.
Uainhira konfirma kona-ba populasaun balun husi Liran ne’ebé halo mós tratamentu iha estabelesimentu ospitalár, Dano Pires de Sousa hateten, iha tinan ne’e seidauk iha pasiente ruma husi Liran mai tratamentu maibé iha tinan kotuk, ospitál referidu atende pasiente husi Liran.
“Iha tinan sira, atendimentu halo ba populasaun Liran ho moras oioin no pasiente ne’ebé hetan moras TBC, pesoál médika sira husu atu halo tratamentu tuir programa ho durasaun fulan-neen, balun konsege hela tuir tempu ne’e maibé balun nia tratamentu la hotu. Pasiente Liran prefere halo tratamentu iha Atáuru tanba tuir sira distánsia besik no tratamentu gratuitu,” Diretór Servisu Autoridade Administrativa Atáuru, haktuir.
Notísia relevante:2018-2024, pasiente Illa Liran halo tratamentu iha Ataúro hamutuk 15
Ospitál ne’e atende pasiente husi Liran iha ne’ebé pasiente balun lori karta referénsia, kazu balun ne’ebé labele atende iha ospitál ne’e, transfere ba iha Ospitál Nasionál Guido Valadares. Aleinde moras TBC, moras seluk mak sepatik no maternidade ka fó partu ba inan isin rua.
Difikuldade ne’ebé daudaun ne’e hasoru mak sistema referál hanesan karreta multifunsaun ne’ebé haruka ba Dili dezde Janeiru maibé seidauk haruka fila tanba sei halo hela manutensaun. Iha aviaun hodi fasilita transferénsia ba pasiente sira no mós ró ambulánsia maibé durante tinan ida ona mak laiha informasaun ba ró referidu.
Jornalista: Joanico de Araújo
Editór: Rafael Ximenes de A. Belo
