DILI, 18 Marsu 2025 (TATOLI)-Organizasaun naun-governamentál PRADET serbisu hamutuk ho Ministériu Solidariedade Sosiál no Inkluzasaun (MSSI) fó asisténsia ba ema ho problema saúde mentál ka defisiénsia psiko-sosiál iha Timor-Leste (TL).
“PRADET nafatin halo akompañamentu no asisténsia ba maluk sira ne’ebé moras mentál iha área tolu mak iha komunidade, dalan-ninin no mós iha munisípiu sira, entaun alvu ne’e mak sai hanesan kobre husi programa ekstensaun, durante ne’e mós servisu hamutuk ho MSSI hodi haree ba programa moras mentál”, Koordenadór asisténsia programa moras mentál PRADET, Nicolau Vicente Ximenes, hateten ba jornalista sira iha edifísiu PRADET, Manleuana, segunda ne’e.
PRADET mós parseria ho liña saúde munisipál hodi halo tratamentu intensivu durante fulan tolu ba kazu agresivu. “Ami mós halo kolaborasaun ho servisu saúde munisípiu sira hodi atende kazu ne’ebé mak agresivu, ami halo transfere referál husi munisípiu mai atu hetan tratamentu intensivu ba iha períodu emerjénsia no refere mós ba iha Laklubar durante fulan tolu”, koordenadór ne’e hateten.
Iha sorin seluk, Ministra Solidariedade Sosiál no Inkluzasaun, Verónica da Dores, hateten, ba ema ho kondisaun moras mentál, governu nia inisiativa mak kria uma mahon ho kondisaun digna hodi asegura no sira balun ne’ebé sei nafatin moris iha dalan-ninin ne’e tanba família abandona, lakohi halo kooperasaun ho Governu.
“Ema moras mentál barak iha Díli laran ne’e, tanba ninia família mós la suporta (apoia) kona-ba moras mentál ne’e. Se bainhira ami lori nia ba Laklubar no Tibar entaun tenki iha kooperasaun ho família, tenki akompaña. Servisu ne’e la’ós ami mesak”, Ministra ne’e reforsa.
Bazea ba progresu no rezultadu ne’ebé PRADET rejista no konsege halo asisténsia ema ne’ebé sofre moras mentál sira iha tinan kotuk mak hamutuk husi área tolu – iha komunidade, dalan-ninin no mós munisípiu, ne’e na’in-141, kompostu husi mane na’in-70 no feto 71.
Jornalista: Alexandra da Costa
Editór: Rafael Ximenes de A. Belo
