OEKUSI, 21 Marsu 2025 (TATOLI) – Asosiasaun Halibur Defisiénsia Matan Timor-Leste (AHDMTL) koordena Autoridade Rejiaun Administrativa Espesiál Oekusi Ambeno (RAEOA), hodi ba futuru bele estabelese sentru formasaun ida kona-ba Ema ho Defisiénsia (EhD) Matan iha Oekusi.
Objetivu atu estabele sentru formasaun ne’e ba fortifika entre AHDMTL ho RAEOA tanba bazeia ba dadus EhD tuir asesmentu, barakliu mak seidauk asesu ba formasaun no balun hela ho abandonadu liuliu asesu informasaun, edukasaun no abandona, nune’e la goja sira-nia direitu ba atividade sira tuir Konstituisaun artigu 21 katak sidadaun ho defisiénsia hanesan ho sidadaun seluk.
Notísia relevante:AHDMTL fasilita formasaun bázika ba defisiénsia matan RAEOA
“Tan ne’e mak ami mai atubele ko’alia ho parte Autoridade RAEOA, sei bele estabelese sentru formasaun AHDMTL nian iha Oekusi hodi transforma Ema ho Defisiénsia asesu ba edukasaun formál,” Hafoin ramata enkontru, Diretór Exekutivu AHDMTL, Gabriel Ponsiano de Sousa, informa iha Oekusi, sesta ne’e.
Iha konvensaun direitu EhD ratifika ona iha 2022, maibé nia implementasaun iha Timor-Leste seidauk iha liuliu iha área edukasaun, tan ne’e AHDMTL hakarak atu fortifika liutan implementasaun konvensaun ida-ne’e, la’os de’it Governu implementa, bele haforsa mós husi ONG sira-ne’ebé haree ba asuntu defisiénsia.
“Ha’u hanoin ida-ne’e mak objetivu husi AHDMTL nian mai ko’alia ho Autoridade RAEOA atubele autoriza hela fatin ba estabelese sentru formasaun iha Oekusi liuliu ko’alia mós autoridade atu kria asesibilidade ba EhD hotu atu-bele asesu,” nia hateten.
Tuir dadus AHDMTL iha desde 2019 to’o 2022 halo ona formasaun letra no komputadór báziku ba na’in-20, maibé na’in 10 la konsege remata tanba fatin no na’in-10 kontinua formasaun iha Dili.
Nune’e iha 2023 AHDMTL kontinua fasilita formasaun ba kliente na’in-lima inklui dotora na’in-ida, no formasaun ne’e hetan apoia finanseiru husi Autoridade RAEOA.
“Husi kliénte defisiénte matan na’in-25 ne’e, ita konsege lori ona na’in-rua ba eskola iha universidade no seluk kontinua hala’o iha servisu iha servisu fatin, tan ne’e mak ita lakoi atu para maibé tenki kontinua,” nia akresenta
Iha biban ne’e, Sekretária Rejionál ba Edukasaun no Asuntu Sosiál, Inácia Tamele, konsidera sorumutu ne’e importante, nune’e nia sei relata Prezidente Autoridade RAEOA atu konsidera.
“Ohin ami halo diskusaun barak, durante ne’e ita iha ona asistente ba EhD ho tipu hanesan ain, liman, matan no tilun. Ohin ha’u labele responde kedas kona-ba rekomendasaun sira, maibé ami sei relata ba Prezidente Autoridade RAEOA atu konsidera asuntu sira-ne’e iha planu 2026” nia dehan.
Notísia relevante:AHDMTL rekomenda ME fasilita manorin-na’in hanorin ema ho kondisaun defisiénsia
Jornalista: Abílio Elo Nini
Editór: Florencio Miranda Ximenes
