DILI, 01 Abríl 2025 (TATOLI)—Diretór Nasionál Desportu Federadu Ministériu Juventude Desportu Arte no Kultura (MJDAK), Oscar Dias Quintas, hateten tau ona orsamentu hamutuk $35.00 hodi apoiu ba Komité Paralímpiku Nasionál Timor-Leste (CPNTL, sigla portugés) hodi realiza festivál nasionál desportu paralímpiku iha tinan 2025.
“Ministériu nafatin fó apoiu ba modalidade desportiva sira hotu, nune’e ita mós fó apoiu ba CPNTL hodi realiza festivál nasionál desportu paralímpiku,” Oscar hateten ba Agência TATOLI iha edifisiu MJDAK, Lecidere, tersa ne’e.
Nia dehan, festivál desportiva paralímpiku fó liu oportunidade ba modalidade desportiva hirak ne’ebé halibur sidadaun hirak ne’ebé ho kondisaun defisiénsia fiziku.
Antes ne’e, iha tinan kotuk Governu liuhusi MJDAK apoiu $36.000 ba CPNTL hodi realiza eventu festivál nasionál desportu paralímpiku 2024.
Durante eventu 2024 ne’e, totál atleta ne’ebé partisipa hamutuk 100-resin ne’ebé mai husi modalidade lima (5) mak hanesan Badminton, Atletizmu, Xadres, Hiit-besi no Tenis Meza. Enkuantu premiu ne’ebé komisaun prepara ona ba atleta manán-na’in sira mak hanesan osan no sertifikadu apresiasaun.
Jornalista : Hortencio Sanchez
Editór : Cancio Ximenes
