VIKEKE, 02 Abríl 2025 (TATOLI)—Autoridade Uatukarbau halo ona koordenasaun ho Ministériu Agrikultura Peska, Pekuária no Floresta (MAPPF) hahú koloka ekipamentu pezadu hodi halo normalizasasun ba irrigasaun Hae-Oli, suku Irabin de Baixo, postu Uatukarbau, munisípiu Vikeke.
Notísia Relevante: Udan boot estraga irrigasaun Osoria-Uaibilesa no Hae-Oli iha Uatukarbau
“Kona-ba irrigasaun Hae-Oli ne’ebé hetan estragu husi udan-boot foin lalais fulan-Marsu, labele distribui bee ba natar Hae-Oli. Nune’e, foin lalais ne’e ami-nia administradór halo koordenasaun servisu ba MAPPF Vikeke hodi koloka ekipamentu pezadu eskavatór iha postu Iliomar, agora ekipamentu koloka ona iha irrigadaun Hae-Oli hodi halo normalizasaun ba irrigasaun ne’ebé hetan estragu husi mota,” Xefe suku Irabin de Baixo, José Baptista do Carmo, ba Agência Tatoli, iha suku Irrabin de Baixo, ohin.
Xefe suku Irabin de Baixo ne’e relata, daudaun ne’e agrikultór no operadór eskavatór halo hela normalizasaun ba irrigasaun nia hun iha mota laran, depois ramata sei kanaliza fali bee ba natar hodi agrikutór sira halo natar.
“Agora eskavatór no ita-nia agrikultór sira normaliza hela irrigasaun iha mota laran, atu taka fila-fali rai no fatuk sira hodi fornese bee ba natar. Ba noralizasaun irrigasaun Hae-Oli ne’e, foin lalais servisu MAPPF apoia mina gazoel bidon ida hodi halo normalizasaun ba irrigasaun ne’e,” nia dehan.
Tanba ne’e, nia husu ba Governu liuhusi MAPPF nafatin fó atensaun ba irrigasaun Hae-Oli tanba ba oin sei udan, karik akontese udan mota sobu irrigasaun Hae-Oli tenke normaliza atu labele difikulta ba distribuisaun bee ba natar sira.
“Se hare iha tiha natar mak irrigasaun aat fali, ita-nia agrikultór sira-nia hare bele sai aat. Tan ne’e, Ministériu nafatin fó atensaun ba Irrigasaun Hae-Oli, se bele koloka permanente eskavatór iha postu Uatukarbau. Karik, irrigasaun ruma mota sobu, ita responde normaliza sedu,” nia hateten.
Fó hanoin fali katak irrigasaun Hae-Oli hetan estragu tanba mota sobu iha loron domingu (16 Marsu 2025), hodi difikulta distribuisaun bee ba natar.
Tuir dadus, natar Hae-Oli ho rai ektare hamutuk 36 no sei fó benifísia ba uma kain 26 iha suku Irabin de Baixo, postu Uatukarbau, munisípiu Vikeke.
Entretantu, Governu liuhusi Ministériu Agrikultura Peska, Pekuária no Floresta (MAPPF) liuliu Diresaun Irrigsaun Nasionál (DIN) normaliza irrigasaun Hae-Oli iha 03 Fevereiru. Irrigasaun referida lokaliza iha suku Irabin de Baixo, postu administrativu Uatucarbau, munisipiu Vikeke ne’ebé aat kuaze tinan 11 ne’e, atu bele fasilita agrikultór sira halo fali natar.
Notísia Relevante: MAP destaka ona ekipamentu pezadu hodi normaliza irrigasaun iha Uatucarbau
Jornalista : Vitorino Lopes da Costa
Editór : Cancio Ximenes
