ERMERA, 03 Abríl 2025 (TATOLI)—Diretór Jerál Desportu Ministériu Juventude Desportu Arte no Kultura (MJDAK), João Rodrigues, hateten daudaun ne’e empreza Quatros Colegas Unipesoál, Lda, reabilita hela Estádiu Munisipál Dili hodi prepara ba jogu Komunidade Nasaun Ko’alia Lian Portugés (CPLP-sigla portugés) ne’ebé sei realiza fulan-Jullu 2025 iha Dili.
Notísia Relevante: MJDAK-FTTL diskute preparasaun atleta ba jogu CPLP
“Estádiu Dili ita prepara ba jogu CPLP, agora empreza timoroan ida-nian mak reabilita hela maibé ita fó meta ba sira tenke finaliza iha fulan-Jullu. To’o fulan-Jullu sira tenke entrega ba ita hodi halo abertura ba jogu CPLP,” João hateten ba Agência TATOLI iha Gleno, kuarta ne’e.
Orsamentu ba projetu reabilitasaun ne’e, nai dehan, daudaun ne’e sei iha faze verifikasaun husi Agência Dezenvolvimentu Nasionál (ADN) no bainhira finaliza ona mak sei fó sai ba públiku.
Tanba ne’e, empreza utiliza osan privadu hodi halo reabilitasaun ba Estádiu referidu, no parte ne’ebé hadi’a mak troka pista foun, hadi’a toilet fatin no kanaliza bee ba Estádiu laran, tau lampu haleu iha Estádiu laran no seluk tan.
Tuir oráriu fiksu ne’ebé iha jogu internasionál ne’e sei realiza iha fulan-Jullu hahú loron 17-27 ho modalidade hitu mai husi nasaun membru CPLP hotu.
Modalidade hirak ne’ebé sei kompete iha jogu ne’e mak hanesan futeból kampu boot, basketból 3 vs 3, voleiból praia, xadres, atletizmu, karate-do no taekwondo.
Jornalista : Hortencio Sanchez
Editór : Cancio Ximenes
