DILI, 13 Maiu 2025 (TATOLI)-Koordenadór Gabinete Unidade Kurríkulu Nasionál, João Maupelo, hatete Ministériu Edukasaun (ME) liuhusi diresaun ne’e hahú ona hakerek manuál ba alunu oitavu-nunu anu.
“Sétimu anu nian ne’e finaliza ona ho disiplina hamutuk 10 ho nia modalidade agrupamentu tolu”, Maupelo dehan ba jornalista TATOLI iha nia knaar fatin Vila Verde, tersa ne’e.
Nia dehan agrupamentu tolu ho disiplina 10 mak hanesan dezenvolvimentu lian mak tetun, portugés no inglés. Dezenvolvimentu sientífiku iha matemátika, siénsia naturál, no siénsia sosiál. Dezenvolvimentu pesoál no sosiál iha fraternidade umana, morál no étika, saúde bem estar, edukasaun fízika, arte no kultura, inklui relijiaun.
Nia dehan dirasaun ne’e konsulta no finaliza ona esbosu kurríkulu terseiru siklu ensinu báziku nian finaliza ona hein manuál alunu hotu mak implementa gradualmente.
“Iha kurríkulu ne’e ita reforma buat balun de’it, la’ós hotu-hotu. Ita muda disiplina balun de’it”, katak nia. Disiplina atuál istória no jeografia sidadania, siénsia direitu, traballu ba vida sai fali siénsia sosiál. Alende ne’e, balun husi morál vida ba traballu, ajusta fraternidade umana, morál no étika.
Maupelo esplika mudansa importante ida tan mak istória no jeografia muda ba siénsia sosiál. Uluk iha matemátika, iha área dezenvolvimentu sientífiku, siénsia fíziku no siénsia naturál, istória no jeografia. Agora kurríkulu foun nia área traballu ba sientífiku ne’e matemátika, siénsia fíziku naturál no siénsia sosiál.
Dirijente ne’e hatutan área dezenvolvimentu pesoál no sosiál ne’e atuál edukasaun fízika, edukasaun artistika, edukasaun sívika sidadania no direitu umanu, edukasaun relijiaun no morál, kompeténsia ba vida no traballu. Agora área dezenvolvimentu pesoál no sosiál iha fali fraternidade morál no étika, arte kultura, saúde no bem estar, edukasaun fízika no rejiaun.
Notísia relevante: ME introdús abilidade sékulu XXI iha kurríkulu terseiru siklu
Jornalista : Osória Marques
Editora : Rita Almeida
