BOBONARU, 18 Maiu 2025 (TATOLI)—Diretór Servisu Munisipál Saúde (DSMS) Munisípiu Bobonaru, Gíl Bernardo Vicente, alerta ba profisionál Saúde liuliu sira-ne’ebé kolkadu iha área rurál atu labele abandona fasilidade saúde iha oras servisu, tanba komunidade presiza tebes atendimentu saúde durante oras 24 nia-laran.
Notísia Relevante: Saúde Bobonaro fó tratamentu masál ba komunidade Purugua Ilatlaun
“Ha’u husu imi tama servisu tenke pontualidade labele husik fasilidade saúde mamuk, atu nune’e bele halo atendimentu ne’ebé di’ak ba ita-nia komunidade. Profisionál saúde ne’ebé abandona fasilidade iha loron servisu, sei foti sansaun rigorozu,” Nia hateten asuntu ne’e durante halo inkontru ho Pesoál saúde sira iha Maliana.
Nia hateten, durante ne’e atendimentu saúde iha fasilidade saúde ne’ebé eziste iha Munisípiu Bobonaru La’o ho normál no ai-moruk mós sufisiente hela.
Tanba ne’e, nia apela ba profisionál saúde atu masimiza atividade vizita uma kada loron hodi hare direta kondisaun saúde no indetifika komunidade enfrenta moras.
“Ha’u sei fó hatene Xefe kontrola Ita-Boot sira-ne’ebé servisu tuku 08h00 iha postu saúde tuku 014h00 ba leten tenke ba vizita uma hare problema saúde sira hotu, ida-ne’e liga ho HIV/SIDA, Tuberkuloza (TBC), nutrisaun ho tan moras seluk hanesan Hipertensaun tanba agora ita rekursu barak,” nia hateten.
Enkuantu Munisípiu Bobonaru iha sentru saúde hitu, Kapitál Referál ida no postu saúde kuaze 3- resin.
Notísia Relevante: Diretór Saúde Bobonaro la tolera pesoál saúde abandona serbisu
Jornalista : Sergio da Cruz
Editór : Cancio Ximenes
