DILI, 16 Maiu 2025 (TATOLI)—Pároku Parókia Coração de Jesus Bekora, Pe. Domingos Soares Maubere, hakotu ona iis iha sala Intensive Care Unit (ICU) Hospital Nacional Guido Valadares (HNGV), sesta ne’e, tuku 07:20 Otl.
Amu Maubere hala’o tratamentu iha HNGV durante loron ualu, loron tolu iha sala VIP no loron lima iha sala ICU, hahú husi loron 08 Maiu 2025.
Antes ne’e, Diretór Servisu Apoiu Diagnóstiku no Terapéutiku HNGV, Vidal Lopes, haktuir katak Padre Maubere enfrenta moras komplikadu, tanba ne’e médiku sira iha HNGV halo de’it kuidadu paliativu, moras ne’ebé iha faze terminanasaun ona.
Lopes haktuir, Padre Domingos antes ne’e transferidu bá Ospitál Malázia durante dala haat ho otimu liu, maibé moras ne’e tama ona faze terminadu, tan ne’e Ospitál Malázia haruka filafali Padre Domingos mai Timor hodi halo tratamentu ho kategoria paliativu de’it.
Reprezentante Arkidioseze Dili, Pe. Juvito do Rego (klaran), prezide misa requiem ba Maktoban Padre Domingos Maubere. Imajen TATOLI/Felicidade Ximenes
Notísia relevante: Padre Domingos Maubere ho kondisaun grave iha HNGV
Padre ne’ebé iha tempu difísil kontribui luta maka’as ba autodeterminasaun ne’ebé moris iha 12 Maiu 1952 ne’e, nia mate-isin sei lori sai husi mortuáriu bá iha Kapela HNGV, iha-ne’ebé Reprezentante Arkidioseze Dili, Pe. Juvito do Rego, sei dirije misa requiem ba Maktoban iha tuku 09:00 Otl no tuku 11:00 sei tranzlada bá iha nia rai moris fatin, Postu Administrativu Letefoho, Munisípiu Ermera.
Hafoin iha Letefoho, aban (17/05), sei tranzlada hikas Maktoban mai iha Dili hodi hatuur iha Parókia Sagrado Coração de Jesus Bekora, nune’e fó espasu (oportunidade) ba sarani sira atu presta omenajen ikus ba líder ida husi Igreja Katólika iha Timor-Leste ne’e. Tuir ajenda, iha 19 Maiu 2025, sei selebra misa fúnebre ba Amu Maktoban iha Igreja Katedrál Dili, tuku 10:00, prezide husi Arsebispu Metropolitana Dili, Dom Virgílio Kardeál do Carmo da Silva no hafoin misa sei haloot Maktoban iha Semitériu Padre sira-nian iha Maloa, Ailok-Laran, Dili.
Tuir observasaun jornalista TATOLI iha HNGV katak Primeiru-Ministru, Xanana Gusmão, Dom Virgílio Kardeál, membru governu sira, membru Parlamentu Nasionál, padre, madre no sarani sira vizita Amu Maktoban nia mate-isin iha mortuáriu no oras ne’e sarani lubuk hein ona iha Kapela HNGV hodi partisipa misa requiem.
Padre Juvito prezide misa requiem
Bainhira prezide misa requiem, Reprezentante Arkidioseze Dili, Pe. Juvito do Rego, husu ba sarani sira nafatin halo orasaun nune’e Padre Domingos Maubere nia klamar hamutuk ho Maromak iha Lalehan.
“Amu Domingos nia klamar hamutuk ona ho Maromak iha Lalehan, tan ne’e husu bá ita idak-idak atu reza ba nia klamar,” Amu Juvito hateten.
Nia hatutan, Amu Maubere nia falesimentu halo sarani sira fuan moras, maibé ida-ne’e mak moris iha mundu.
Jornalista: Felicidade Ximenes
Editór: Xisto Freitas da Piedade
