DILI, 09 Maiu 2025 (TATOLI) – Parlamentu Nasionál (PN), liuhusi reuniaun plenária estaordinária, sesta ne’e, realiza sesaun solene hodi fó omenajen ba falesimentu maktoban Ernesto Fernandes ‘Dudu’.
Antes realiza sesaun solene, deputadu sira aprova uluk votu pezár ho unanimidade, a favór 51, kontra no abstensaun laiha.
Kontinua kedas ho inu nasionál no um minutu silénsia hodi fó omenajen ba erói sira ne’ebé fó an tomak ba luta libertasaun hodi hetan indepedénsia, liuliu ba memória matebian Dudu nian.
“Ha’u deklara aberta sesaun solene omenajen memória saudozu Ernesto Fernandes ‘Dudu’, antigu Deputadu Parlamentu Nasionál iha lejislatura dalimak”, Prezidente Parlamentu Nasionál, Maria Fernanda Lay, hato’o iha sala plenária.
Sekretária meza lee sai testu votu númeru 7/2025 pezár ba falesimentu Ernesto Fernandes ‘Dudu’, ne’ebé hakotu iis iha loron 06 Maiu 2025, iha Ospitál Nasionál Guido Valadares (HNGV, siglá portugés) ho idade 79. Matebian moris iha Hatulia, munisípiu Ermera, iha 18 Juñu 1945.
Saudozu dezempeña papél importante iha rezisténsia armada kontra okupasaun Indonézia, hanesan mós komandante FALINTIL no lidera funu iha rejiaun IV Ermera.
Entre 1975 no 1982, kombate okupamentu ho kombatente 16 iha Bee-manas, hafoin kaptura no retoma luta armada iha Novembru 1982 no kontinua organiza rezisténsia iha rejiaun ne’ebá.
Hafoin indepedénsia, kontinua serbí nasaun hanesan deputadu iha Parlamentu no eleitu husi Partidu Demokrátiku (PD). Nia defende rekonsiliasaun entre líder istóriku Timor-Leste no enfatiza importánsia rekoñese sakrifísiu feitu durante luta ba indepedénsia hodi promove prosperiedade nasionál.
Rekoñesimentu ba nia kontribuisaun ba libertasaun nasionál, matebian hetan kondekorasaun ho medalla Orden Timor-Leste, iha 25 Novembru 2021.
Deputadu Bankada CNRT, Augusto Domingos ‘Deker’, haktuir matebian ema ida ne’ebé simples. “Saudozu Dudu fundadór ida ne’ebé povu tomak respeita, espesiál liu rejiaun IV no konsidera nu’udar fundadór. Hato’o sentidu kondolénsia ba Timor-Leste ne’ebé lakon dala-ida tan ninia asu’ain ida”, hato’o.
Deputadu Bankada FRETILIN, David Dias Ximenes Mandati, dehan Timor-Leste triste ba falesimentu ne’e, tanba matebian haksumik-an ona iha “ita-nia leet”.
“Ba família enlutada, bankada FRETILIN hato’o sentidu kondolénsia. Maromak sei fó beran no grasa nafatin ba faluk, oan-ki’ak no beioan sira nafatin hodi hala’o moris ida-ne’e”, nia espresa.
Deputadu Bankada PD, Manuel Henrique Noronha, dehan Partidu Demokrátiku no nasaun lakon ona saudozu nu’udar aman unifikadór. “Apá Dudu nia obra polítika sei inspira ami-nia pensamentu no asaun estratéjika hodi liberta povu, forma sosiedade Timór foun ida ba timoroan hotu’’, dehan.
Hanesan mós deputadu PLP, Adolfo Martins, espresa kondolénsia no hateten katak PN no Estadu hakruuk ba saudozu ne’ebé dedika ona nia vida tomak atu harii, defende no hametin país.
Deputada KHUNTO, Olinda Guterres, mós hato’o sentidu kondolénsia ba família no ba PD.
Hafoin intervensaun bankada parlamentár, kompozisaun meza Parlamentu no deputadu sira kontinua presta omenajen ba fotografia matebian nian iha plenária laran, ne’ebé mós akompaña husi família saudozu nian.
Tuir ajenda, hafoin sesaun solene ne’e, Prezidente Parlamentu Nasionál, Maria Fernanda Lay no deputadu sira bá presta omenajen ba matebian nia isin-mate iha nia rezidénsia, iha munisípiu Ermera.
Notísia relevante: Komandu F-FDTL presta omenajen ba Saudozu Ernesto Fernandes “Dudu”
Jornalista: Nelson de Sousa
Editora: Maria Auxiladora
