DILI, 06 Maiu 2025 (TATOLI)—Juíz Prosesu António Carmo husi Tribunál Judisiál Primeira Instánsia Dili, hahú haree pedidu kontestasaun Maria Natércia G. Ferreira ba nomeasaun Prezidente Tribunál Rekursu foun, Afonso Carmona.
Juiza dezembargadora ida iha Tribunál Rekursu, Maria Natércia, hato’o pedidu Providénsia Kautelár ba Tribunál Dili kontesta desizaun Prezidente Repúblika, José Ramos Horta, ne’ebé nomea Prezidente Tribunál Rekursu.
Tuir Natércia katak nomeasaun ne’e la bazeia ba Konstituisaun no lei ne’ebé vigór. Ho razaun ne’e mak Juiza Dezembargadora Maria Natércia iha kuarta (29/4) loraik hasai mandadu sitasaun ho NUC 0110/25.CVTDD ho Providénsia Kautelár lori Prezidente Repúblika, José Ramos Horta, atu hatán ba nomeasaun Prezidente Tribunál Rekursu foun, Afonso Carmona.
Juiza dezembargadora hasai sitasaun Providénsia Kautelár hodi hatama bá Tribunál Judisiál Primeira Instánsia Dili hodi husu Xefe Estadu José Ramos Horta atu hatán sitasaun Providénsia Kautelár ne’e iha prazu loron sanulu (10) nia laran.
Hafoin Juiza Dezembargadora Maria Natércia hatama tiha pedidu kontestasaun bá Tribunál Primeira Instánsia Dili, nune’e iha kinta (30/4), Juiza Administradora Tribunál Judisiál Primeira Instánsia Dili, Edite Palmira dos Reis, distribui kedas bá iha Juíz Prosesu atu haree prosesu referidu.
Tuir informasaun ne’ebé Tatoli asesu katak Juíz António do Carmo mak simu distribuisaun atu kaer prosesu ne’e.
Iha kinta (01/5), tuir loloos Juíz Prosesu António do Carmo haruka sitasaun ba Prezidente Repúblika, José Ramos Horta, hodi kontesta pedidu Providénsia Kautelár ne’ebé hatama husi Juiza Maria Natércia, maibé tanba loron ne’e nu’udár Loron Traballadór Mundiál, entaun feriadu. Nune’e, Juíz António Carmo hato’o fali pedidu sitasaun ba Prezidente Repúblika iha loron sesta (02/5) atu husu Xefe Estadu hatán ba pedidu sitasaun referida.
Ba kestaun ne’e, jornalista sira tenta atu konfirma ba Juiza Administradora Tribunál Judisiál Primeira Instánsia Dili, Edite Palmira dos Reis, maibé nia parte lakohi fó komentáriu.
Tuir informasaun ne’ebé Tatoli asesu katak kuandu Prezidente Repúblika, José Ramos Horta, liuhusi nia advogadu hatán ona sitasaun husi Tribunál ba konstrusaun Juiza Maria Natércia nian, mak sei prosede ba julgamentu iha Tribunál Judisiál Primeira Instánsia Dili.
Jornalista: Natalino Costa
Editór: Xisto Freitas da Piedade
