KOVALIMA, 21 Maiu 2025 (TATOLI) – Ema deskoñesidu kontinua tuda sidadaun sira ne’ebé uza transporte hala’o viajen husi Dili mai iha Kovalima bainhira liuhusi auto-estrada iha suku Tashilin, Postu administrativu Zumalai munisípiu Kovalima.
“Ita-nia joven na’in-rua hetan tuda husi ema deskoñesidu bainhira sira hala’o sira-nia viajen husi Dili mai iha Kovalima liuhusi Auto estrada parte iha suku Tashilin foin lalais ne’e”, Reprezentante Komandante PNTL Munisípiu Kovalima, Superintendente Asistente Polísia , Joaquim da Costa informa ba jornalista iha kampu Ladi, ohin.
Hafoin prátika asaun referida, fatuk konsege kona-ba vítima ho naran Romeo nia ain fuan parte loos ho kanek ne’ebé kmaan no suspeitu halai lakon.
“Ita fó kedas orientasaun iha komandu liuhusi seksaun rezerva polísia iha komandu ne’ebé hetan apoiu husi eskuadra Zumalai ba iha fatin akontesimentu atu identifika oknum”, nia dehan.
Notísia relevante:PNTL Kovalima buka tuir ona autór kesi tali iha auto-estrada
Ho akontisementu aktu ne’e, PNTL konsidera hanesan aktu insidente tanba PNTL hala’o patrullamentu rutina sempre ba iha fatin ne’ebé suspeitadu ,maibé PNTL foin retira patrullamentu mosu kedas asaun ne’e.
“Ita la espera situasaun ida-ne’e atu akontese nune’e PNTL foti asaun ita hala’o patrullamentu ho rutina oinsá atu halo prevensaun maibé sempre akontese”, nia hateten.
Ho nune’e PNTL presiza ko’alia ho autoridade lokál sira atu partilla informasaun ba inan-aman no joven sira atu labele kontinua prátika aktu ne’e – tuda subar ema.
Jornalista:Celestina Teles
Editór: Rafael Ximenes de A. Belo
