VIKEKE, 21 Maiu 2025 (TATOLI)—Koordenadór Sentru Integradu Agro-Komérsiu Indústria Raitahu, suku Uma Kraik, postu Vikeke Vila, munisípiu Vikeke, Agusto Soares Pinto, informa produsaun iha Sentru Integradu Agró-Komérsiu Indústria Raitahu implementa atividade pekuária karau susu-been no ortikultura.
Notísia Relevante: MAPPF deside jere rasik sentru agro-komérsiu Raitahu
“Atividade produsaun ne’ebé daudaun ne’e ami implementa iha Sentru Integradu Agro-Komérsiu Indústria Raitahu prepara ai-han ba karau susu-been nian, tanba ita agora iha karau timur ne’e hamutuk 11, inan 10 no aman ida (1). Tan ne’e, ita presiza prepara kuda ninia hahan atu fó ba karau sira-ne’ebé iha sentru. Aleinde ne’e, ami mós kuda batar Kay Rala no batar kinur. Bainhira kolleta ami sei prodús konsentra hodi fornese ba karau-oan. Ne’ebé, aban bainrua karau-oan moris karik, ami atu fó han ba karau-oan sira-ne’e,” Agusto Soares Pinto hateten ba Agência Tatoli, iha postu Vikeke Vila, ohin.
Ortikultura nian, nia dehan, daudaun ne’e traballadór sira hahú hamoos fatin ortikultura nian, maibé tempu sei udan hela ne’ebé udan ne’e para hafoin bele fila-rai hodi kuda modo.
“Ba atividade ortikultura ami hamoos ona duut, bainhira udan ne’e para, tratór hahú fila-rai hodi kuda modo. Atividade limpeza iha sentru laran agora tratór hamoos hotu ona, fila-rai ne’e lolos ohin ami fila ona rai maibé udan seidauk para. Tanba ne’e mak ami seidauk bele fila-rai,” nia haktuir.
Tuir nia, sentru Ratahu sei kuda batar Kay Rala ektare ida (1) no batar kinur ektare ida (1) hodi para ba animál karau ne’ebé iha sentru ida-ne’e. Nune’e mós kuda Lamtoro no Kingres ektare ida hanesan ai-han ba animál nian.
Progresu konstrusaun karau-luhan to’o agora daudaun ne’e besik atu finilza ona, no bainhira finaliza ona ne’e mak sei hatama karau ba laran mak fó han.
Produsaun manu no ikan
Nia hatutan, kona-ba produsaun manu no ikan ne’e, agora sei paradu tanba prepara liu ba karau susu-been, tan ne’e mak atividade rua ne’e seidauk implementa to’o ohin loron.
“Ba atividade hanesan manu no ikan agora seidauk. Ami prepara liu ba karau susu-been nian. Nune’e mós atividade planta indústria hanesan nuu no hudi dellos agora ami hamoos de’it ninia hun sira,” nia hateten.
Dezafiu, nia dehan, Sentru Ratahu enfrenta mak hanesan menus rekursu traballadór, konmustível, eletrisidade no klíma udan labele fila-rai tanba bele estraga taxu tratór nian tohar entaun tenke hein udan para tiha lai.
“Difikuldade ne’ebé ami hasoru mak menus traballadór. Traballadór agora iha ne’e hamutuk na’in-18 mak serbisu iha área rai kuaze ektare 25, rekusu la sufisiente. Nune’e, ami presiza tán ema na’in-30 mak bele kobre atividade sira-ne’e. Preokupasaun ne’e, ami aprezenta ona ba nasionál, maibé liga mós ba ita-nia orsamentu. Tanba ne’e, mak seidauk responde ami-nia problema ne’ebé ami hato’o,” nia dehan.
Problema seluk, iha ne’e mós eletrisidade seidauk instala ne’ebé sai obstaklu ida ba sira, kombustível ba tratór mós sai problema tanba sira tenke koordena diretór serbisu Ministériu Agrikultura, Pekuária, Peska no Florests (MAPPF) Vikeke mak foin distribui kombustível ba sirai hodi hala’o atividade fila-rai iha sentru laran.
Maske hasoru dezafiu, nia dehan, traballadór sira nafatin iha kompromisu hodi hala’o atividade sira-ne’ebé implementa iha Sentru Integradu Agró-Komériu Ratahu hanesan pekuária, ortikultura no manutesaun ba ai-horis planta indústria sira-ne’ebé antes ne’e kuda ona.
Jornalista : Vitorino Lopes da Costa
Editór : Cancio Ximenes
