DILI, 21 Maiu 2025 (TATOLI)—Prezidente Konsellu Nasionál Juventude Timor-Leste, (CNJTL-sigla portugés), Maria Dadi Soares Magno, husu ba joven sira nafatin reziliente hodi estuda maka’as atu kontribui ba nasaun ida-ne’e.
“Liga bá Loron Restaurasaun Independénsia RDTL ba dala XXIII ne’ebé horisehik (20 Maiu) ita selebra ona mak ha’u husu ba joven sira tenke reziliente no sai joven prezente, tanba ema haree de’it ita-nia nakukun, tan ne’e la deskobre ita-nia talentu brillante sira-ne’ebé mak iha. Tanba ne’e, nafatin reziliente, estuda maka’as hodi kontribui ba ita-nia nasaun,” Maria Dadi Soares Magno, hateten ba TATOLI, iha nia kna’ar fatin, CNJTL, Faról, kuarta ne’e.
Nia dehan, povu Timor-Leste komemora ona Loron Restaurasaun Independénsia, hanesan povu, tenke orgullu nu’udár timoroan, dignifika eroi no povu tomak espesialmente ba juventude loriku asua’in fó ona sira-nia kontribuisaun tomak.
“Selebrasaun Loron Restaurasaun ne’e la’ós ita festa de’it. Ha’u temi konseitu ida dignifika ita-nia eroi sira-ne’e ita mós selebra ho kontente, tanba hakarak ka lakohi ita iha ona liberdade, liberdade hanesan sidadaun, liberdade ne’ebé mak ita bele túr hanesan povu ida iha rai ida, iha nasaun ida, iha ita-nia Konstituisaun. Agora, liga ba kontestu atuál, depois ida-ne’e, ita temi ona reflesaun pasu ida atu reflete ba ita-nia vida hanesan Estadu. Hanesan nasaun Timor ita haree katak iha asuntu lubuk ne’ebé mak presiza tebes ita hotu nia kontribuisaun, la’ós Estadu de’it,” Dadi subliña.
Nia afirma, ema hotu ko’alia Estadu, signifika la’ós de’it órgaun soberania haat ne’e maibé povu tomak tenke hatuur didi’ak prinsípiu fundamentál ne’ebé mak iha objetivu Estadu ko’alia katak misaun mak tenke konkretiza povu nia moris di’ak, povu moris hakmatek, povu moris ho pás, povu moris ho justisa sosiál, povu moris iha prósperu.
“Ita haree katak situasaun balun liga ba konseitu setór sosiál barak mak ita sei iha problema. Bainhira ita ko’alia justisa sosiál, ita liga bá setór edukasaun no saúde,” nia tenik.
CNJTL rekomenda ba órgaun Estadu tolu hanesan Parlamentu Nasionál, Governu no Tribunál tenke haree didi’ak ida-ne’e tanba halimar demais ho konfiansa ne’ebé mak povu fó, ne’e la justu.
“Ita tama bá asuntu sosiál, maibé espesífiku ba edukasaun. Banhira ita liga ba joven ho edukasaun, joven ho traballadór, haree demanda (nesesidade) kuaze tinan prodús joven ne’ebé mak akaba universidade, akaba ensinu sekundáriu no ensinu superiór, kuaze barak liu duké kampu serbisu ne’ebé mak Estadu loke,” Dadi informa.
Tuir nia, setór tolu ne’e mak la absorvidu, signifika sai gap boot, nia efeitu mak dezempregu ne’e realidade no ida-ne’e mak ko’alia tenke seriedade hodi haree problema ne’ebé mak eziste.
“Ita hatene katak despeza Estadu maihusi minarai. Ita sira-ne’e kuaze uza orsamemtu jerál Estadu, tanba ne’e presiza haree ba ida-ne’e,” nia konklui.
Jornalista: Felicidade Ximenes
Editór: Xisto Freitas da Piedade
