DILI, 26 Maiu 2025 (TATOLI)—Ministériu Saúde (MS) liuhusi Servisu Saúde Munisípiu Dili hamutuk ho Menzies Timor-Leste, World Mosquito Program, segunda ne’e, sosializa métodu Wolbachia ba membru FALINTIL-Forsa Defeza Timor-Leste (F-FDTL).
“Ami ohin mai iha-ne’e sosializa métodu Wolbachia ba militár sira. Saida mak Wolbachia no mós Wolbachia ne’e atu halo saida, entaun ita sensibiliza ida-ne’e ba forsa sira nune’e sira bele tulun kombate dengue,” Diretór Servisu Saúde Munisípiu Dili, Mateus Pinto, hateten nia diskursu iha salaun F-FDTL, Fatuhada, Dili.
Nia afirma, iha tinan 2021 to’o 2022, dengue ataka Timor-Leste, inklui COVID-19, iha-ne’ebé pasiente mate kuaze 50-resin, kazu hamutuk rihun 5 iha munisípiu hotu-hotu, maibé munisípiu Dili mak kazu dengue aas.
Notísia relevante: Populasaun liu 200.000 iha Dili hetan benefísiu hosi programa Wolbachia
Nia hateten, Ministériu Saúde no mós Menzies Timor-Leste ne’ebé bele simu programa Wolbachia, oinsá mak bele implementa iha Timor-Leste, tan ne’e husu forsa sira-nia ajuda atu bele fó mós informasaun ba inan-aman sira no mós ba komunidade atu kombate dengue.
Iha fatin hanesan, Supervizór Diresaun Saúde Militár, Koronél Guido de Oliveira, dehan sosializasaun métodu Wolbachia ba membru F-FDTL sira hodi komprende ho di’ak para kombate moras dengue iha Timor-Leste.
Nia relata, moras dengue sai dezafiu ba saúde públika ne’ebé sériu tebes tanba kada tinan sempre afeta timoroan, inklui membru família forsa armada nian.
Guido informa, partisipasaun hirak-ne’e reflete duni kompromisu Forsa Armada nian no fiar katak métodu ida-ne’e la’ós de’it depende ba siénsia, maibé mós lideransa, disiplina no envolvimentu komunidade no membru F-FDTL sira hotu.
“Forsa Armada ninia papél importante tebes mak atu defende ba nia rai no ninia povu, maibé mós forsa sei fó apoiu kona-ba métodu Wolbachia ho di’ak,” nia konklui.
Jornallista: Felicidade Ximenes
Editór: Xisto Freitas da Piedade
