KUALA LUMPUR, 26 Maiu 2025 (TATOLI)—Primeiru-Ministru (PM), Kay Rala Xanana Gusmão sei hetan oportunidade atu ko’alia durante sesaun plenária Simeira Asosiasaun Nasaun Sudeste Aziátiku (ASEAN) ba dala-46.
Atu prienxe sekuénsia ne’e, PM Xanana ho delegasaun Timor-Leste nian to’o ona iha Malazia iha domingu 25 Maiu 2025.
Durante enkontru ne’e, meza sei konvida Timor-Leste atu ko’alia kona-ba ajenda hotu bazeia ba matadalan foun.
Simeira ASEAN ba dala-46 hala’o iha Kuala Lumpur,iha Sentru Konvensaun Kuala Lumpur (KLCC -Kuala Lumpur Convention Cneter), ne’ebé realiza ho tema Prezidénsia ASEAN 2025 Malázia nian katak “Inkluzividade no Sustentabilidade”, sei halibur líder sira husi Estadu-membru ASEAN nian hodi diskute kona-ba kestaun rejionál sira no trasa diresaun futuru husi kooperasaun ASEAN nian.
Notísia relevante : Outubru, Timor-Leste sai membru ASEAN
Sekretáriu Estadu komunikasaun Sosiál, Expedito Loro Dias Ximenes, hateten, PM Xanana sei iha reuniaun bilaterál ho Xefe Governu husi nasaun membru ASEAN sira.
“Primeiru-Minstru sei halo aprezentasaun kona-ba dezenvolvimentu ne’ebé Timor-Leste halo ba iha enkontru bilaterál sira. Partisipasaun Timor-Leste nian iha simeira ASEAN ba dala-46 ne’e hanesan pontu kulminante no estratejiku,” katak Expedito iha Hotel Intercontinental Kuala Lumpur – Malázia, Domingu (25/05).
Nia dehan, IX Governu nafatin desizivu atu partisipasaun ne’e bele hetan rezultadu ne’ebé diak no hein katak esforsu tomak ne’ebé povu hein bele iha rezultadu di’ak.
Pontu haat importante iha sesaun dadeer, iha loron dahauluk simeira ASEAN ba dala-46 katak Simeira ASEAN nu’udar enkontru diplomátiku altu nível ne’ebé hala’o tinan-tinan husi Estadu membru sira.
Simeira ASEAN sai hanesan plataforma ida ba líder sira husi nasaun membru sira-ne’e atu halibur no diskute asuntu oinoin tantu rejionál no internasionál sira ne’ebé maka sai preokupasaun globál.
Atividade ne’e permite líder sira atu troka hanoin, fahe hanoin, no foti desizaun kona-ba asuntu sira ne’ebé relasiona ho kooperasaun polítika, ekonómika, sosiál, no seguransa iha rejiaun laran.
TATOLI
