DILI, 26 Maiu 2025 (TATOLI)—Eis-Ministru Interiór, António Armindo, sai konvidadu onra hodi partisipa serimónia impozisaun diviza ba membru Komandu Polísia Nasionál Timor-Leste (PNTL) Munisípiu Dili hamutuk na’in-409.
“Primeiru, ha’u ho ha’u-nia espoza sente onradu tebes bele hetan konvite hodibele partisipa iha eventu ne’e,” António hateten ba jornalista Tatoli hafoin partisipa iha serimónia imposizaun diviza ne’ebé hala’o iha Sentru Konvensaun Dili (CCD-sigla portugeza), segunda ne’e.
Nia espera katak ho promosaun diviza ne’e bele profisionaliza instituisaun PNTL iha futuru.
“Espera katak ba sira-nia diviza ne’ebé foun, hatudu nafatin sira-nia neutralidade, imparsialidade no responsablidade tomak,” nia konklui.
Entretantu, iha ámbitu impozisaun diviza ba membru PNTL na’in-409, Komandu PNTL Munisípiu Dili, Segundu Komandante ein-substituisaun Komandante Jerál PNTL, Komisáriu Pedro Belo, husu ba membru PNTL sira bá-oin hatudu responslidade durante halo funsaun, kontinua hatudu lealdade, respeita ierárkia, hatudu disiplina ba komandante sira hodi serbí instituisaun PNTL ho di’ak liután.
Iha fatin hanesan, Ministru Interiór, Francisco Guterres husu ba membru PNTL ne’ebé promovidu atu kontinua tuir formasaun nune’e hasa’e sira-nia koñesimentu.
“Husu ba Komandu atu oferese promosaun ba membru PNTL sira-ne’ebé promovidu ona nune’e aban-bainrua koloka sira bá fatin foun karik iha ona koñesimentu ba área ne’ebé sira kolokadu ba,” nia afirma.
Aleinde ne’e, Vise Primeiru-Ministru Asuntu Sosiál no Ministru Dezenvolvimentu Abitasaun Rurál, Mariano Assanami Sabino, hateten promosaun diviza sira hanesan ne’e importante tanba tempu ona profisionaliza PNTL.
“PNTL nu’udár instituisaun ne’ebé hola responsablidade vitál ba seguransa interna país nian tenke profionál iha nia atuasaun sira. Tanba ne’e, ho promosaun ida-ne’e nu’udár parte ida oinsá profisionaliza ita-nia PNTL atu prepara sira halo misaun seguransa ba povu no nasaun inklui iha rejiaun ASEAN nian,” nia tenik.
Jornalista: Natalino Costa
Editór: Xisto Freitas da Piedade
