DILI, 02 Juñu 2025 (TATOLI)–Autoridade Protesaun Sivíl (APC, sigla portugés) liuhusi Gabinete Relasaun Esterna no Komunikasaun, relata relatóriu kona-ba rejistu dezastre naturál ne’ebé akontese iha territóriu Timor-Leste, hahú husi loron 26 Maiu to’o 02 Juñu 2025.
Xefe Gabinete Relasaun Esterna no Komunikasaun, Nelson Nunes de Orleans, haktuir, kada semana APC sempre halo relatóriu dezastre naturál iha Timor -Leste, nune’e rejista tipu dezastre naturál iha territóriu hanesan anin-boot 18, bee-sa’e ida rai-halai tolu, ahi-han uma lima, uma hetan estragu 21 no ema mate tolu.
“Autoridade Protesaun Sivíl halo kedas verifikasaun ba dadus dezastre ne’ebé akontese no apoiu kedas pakote emerjénsia ba vítima afetadu,” Xefe Gabinete informa ba jornalista sira iha edifísiu APC, Kaikoli, Segunda ne’e.
Notísia relevante : APC apoia materiál rekuperasaun ba vitima dezastre naturál 31 iha Bobonaru
Aleinde ne’e, Nelson Nunes konsidera planu prinsipál APC kona-ba monta plaka protejida iha área risku dezastre naturál ne’e importante tebes.
“Ita bele halo prevensaun ba dezastre naturál. Entaun ida-ne’e parte Diresaun Investigasaun Prevensaun mak halo no monta ona iha kada munisípiu maski ami seidauk hetan informasaun maibé medida prevensaun ne’e nafatin la’o,” nia akresenta.
Tanba ne’e, APC mós rekomenda ba komunidade atu evita hela iha fatin risku hanesan mota-ninin, foho-lolon, ai-hun boot no tenke asesu informasaun iha pájina ofisiál Diresaun Nasionál Meteorolojia no Jeofízika (DNMG) nian.
Husi dadus dezastre naturál ne’ebé iha hanesan anin-boot akontese iha Baukau, Ermera, Manufahi, Kovalima, bee-sa’e akontese iha Manufahi, rai-halai akontese iha Baukau no Bobonaru, ahi-han uma akontese iha Ainaru, Baukau, Lautein no Oékusi.
Jornalista : Alexandra da Costa
Editora : Julia Chatarina
