DILI, 03 Juñu 2025 (TATOLI)—TradeInvest, Ajénsia Investimentu no Promosaun Estadu hamutuk ho Uniaun Europeia (UE) fasilita formasaun kona-ba komérsiu eletróniku ba setór privadu sira hamutuk 50 durante loron rua nia laran.
Vise Diretór TradeInveste, Dulio da Silva, hateten TradeInvest iha papél importante iha formasaun ba setór privadu sira, tanba komérsiu eletróniku ka negósiu dijitál ne’e importante tanba mundu iha ona era dijitál, iha-ne’ebé ajuda no prepara setór privadu ba adezaun Timor-Leste ba Asosiasaun Nasaun Sudeste Aziátiku (ASEAN-sigla ingleza) no Organizasaun Mundiál Komérsiu (OMK).
“TradeInveste, hamutuk ho Sentru Komérsiu Internasionál (ITC-sigla ingleza) no UE, hakarak kapasita setór ne’ebé maioria kliente esportadór sira-nian. Empreza sira mai atubele hetan informasaun kona-ba polítika komérsiu eletróniku liuhosi meiu dijitál durante loron rua, hahú 03-04 Juñu,” Dulio da Silva hateten ba Tatoli, iha Kolmera, tersa ne’e.
Tuir nia, formasaun ne’e ajuda tebes atu hasa’e koñesimentu setór privadu sira-nian ba negósiu online. Tanba TradeInvest iha kliente korporativu hamutuk 94, husi ne’e 40 mak esporta produtu kafé, kamii no vanila bá rai-li’ur.
“Entre empreza sira-ne’e, emprezáriu hamutuk 40-resin mak esporta produtu kafé ba Estadu Unidu, Japaun, Makau, Kamerun no mina nuu virjen ba Austrália,” nia dehan.
Iha fatin hanesan, Xefe Kooperasaun Delegasaun UE iha Timor-Leste, Lotam Lerer, hateten katak setór privadu presiza hetan formasaun kona-ba komérsiu eletróniku, tanba ne’e mak UE sei fó apoiu ba polítika komérsiu eletróniku Governu nian ba setór privadu.
“Dezenvolvimentu komérsiu eletróniku ne’e importante ba transformasaun ekonómika. UE iha parseria ne’ebé forte hodi fó apoiu ba empreza sira hodi hadi’a dijitalizasaun liuhosi formasaun. Formasaun sira-ne’e dezeña atu ajuda empreza sira, liuliu empreza ki’ik no médiu sira iha nasaun sira-ne’ebé sei dezenvolve hela atu hadi’a sira-nia kapasidade dijitál,” nia afirma.
Reprezentante ne’e garante katak UE sei kontinua fó apoiu tékniku iha formasaun ba setór privadu kona-ba komérsiu eletróniku.
Jornalista: Felicidade Ximenes
Editór: Xisto Freitas da Piedade
