BAUKAU, 04 Juñu 2025 (TATOLI)–Autoridade Administrasaun Munisipál (AAM) Baukau konsidera infraestrutura estradas urbana no rurál sai prioridade bainhira implementa podér lokál no desentralizasaun administrativa.
Prezidente Autoridade Munisipál (PAM) Baukau, Veneranda Lemos Martins, esplika Munisípiu Baukau preparadu atu simu ekipa avaliasaun kondisaun mínima relasiona ho polítika Governu sentrál kona-ba implementasaun podér lokál no desentralizasaun administrativa.
“Infraestrutura hanesan estrada, ita bele hadi’a, hamoos no tau buat hotu iha orden. Maibé, infraestrutura estrada, parte nasionál hateten atu mai halo (reabilita), tan ne’e ita hein to’o agora,” Prezidente Autoridade Munisipál Baukau hateten iha ninia kna’ar fatin, Vila Nova, Baukau, kuarta ne’e.
Eis deputada ne’e salienta, kondisaun estrada no ponte husi área urbana to’o rurál presiza hetan atensaun tanba parte husi kritéria kondisaun mínima, nune’e AAM nafatin esforsu atu solusiona durante períodu ba preparasaun desentralizasaun administrativa.
Nia husu ona informasaun ba parte Ajénsia Dezenvolvimentu Nasionál (ADN) kona-ba planu reabilitasaun estrada urbana maibé prosesu hotu foin iha faze verifikasaun dezeñu detalladu ne’ebé tuir planu sei fahe ba pakote nune’e bele aselera projetu.
“Infraestrutura de’it mak ita hein,” Veneranda Lemos esklarese.
Enkuantu, kona-ba rekursu umanu, preparadu tanba munisípiu Baukau iha intelektúal barak maibé presiza aumenta kapasidade nune’e hamutuk kontribui ba dezenvolvementu iha Baukau.
Aleinde ne’e, Baukau iha poténsia rekursu naturál hanesan esplorasaun minerál, agrikultura no turizmu ne’ebé futuru bele fó rendimentu ekonomia no loke kampu serbisu hodi redús dezempregu iha Baukau.
“Rekursu umanu ita-nia preparadu tanba tékniku no funsionáriu sira-ne’ebé serbisu iha AAM la’ós ema foun no iha esperiénsia,” Veneranda argumenta.
Veneranda garante sei prenxe kondisaun mínima ne’ebé fó-sai husi Governu sentrál tanba Baukau-oan kuandu hamutuk iha signifikadu unidade hodi bá-oin sei simu podér lokál no desentralizasaun administrativa.
Polítika implementasaun autonomia administrativa bazeia ba Konstituisaun Repúblika Demokrátika Timor-Leste (KRDTL) artigu 72 hateten estabelesimentu podér lokál nune’e loke dalan ba kriasaun lei tolu hanesan lei númeru 23/2023, loron 10 Novembru, ne’ebé sei regulariza implementasaun podér lokál no desentralizasaun administrativa.
Lei númeru 16/2023, loron 31 Maiu, kona-ba finansa munisipál sei regulariza maneira hotu utilizasaun orsamentu no lei númeru 22/2021, loron 4 Novembru, kona-ba eleisaun munisipál sei regulariza mekanizmu eleisaun ba membru asembleia no Prezidente Autoridade Munisipál.
Entretantu, ekipa avaliasaun kondisaun mínima lideradu Ministériu Administrasaun Estatál (MAE) tuir planu iha inísiu fulan ne’e sei to’o iha Baukau hodi haree prosesu serbisu administrasaun tantu iha AAM no postu administrativu ualu.
Jornalista: Natalino Belo
Editór: Xisto Freitas da Piedade
