BAUKAU, 12 Juñu 2025 (TATOLI)—Governu liuhosi Ministériu Administrasaun Estatál (MAE) hamutuk ho Autoridade Administrasaun Munisipál (AAM) sanulu-resin-tolu no Autoridade Administrasaun Ataúru, kinta ne’e, lansa ekipa asisténsia téknika ba prestasaun serbisu iha Munisípiu Baukau.
Diretór Jerál Desentralizasaun no Governasaun lokál MAE, António Guterres, esplika objetivu lansa atividade referida buka hatene asisténsia téknika husi Governu sentrál ba lokál durante tinan-rua ninia rezultadu hanesan lala’ok serbisu administrasaun no rekursu umanu iha kada delegasaun munisípiu hamutuk 19.
“Atividade sira-ne’e la’o duni iha kraik ka lae, ida-ne’e mak bele atinje objetivu kona-ba hakbesik Governu ba povu,” Diretór Jerál Desentralizasaun no Governasaun lokál MAE hateten ba jornalista iha Sentru Konvensaun Baukau (CCB-sigla portugeza) Vila Antiga, Baukau.
António salienta, liuhosi programa referidu mós sei buka hatene kona-ba serbisu munisipál sira hanesan agrikultura liuhosi tratór ne’ebé Governu sentrál apoia ba kada munisípiu relasiona ho atividade fila-rai iha benefísiu direta ba komunidade.
Aleinde ne’e, buka hatene serbisu Edukasaun Munisipál relasiona ho programa merenda eskolár liuliu numéru benefisiáriu no ezekusaun orsamentu konsensaun eskolár ne’ebé halo manutesaun ba fasilidade eskola sira.
Seluk, kona-ba promove setór privadu iha área rurál liuhosi projetu sira Programa Dezenvolvimentu Munisipál (PDM) liuliu foku ba numéru emprezáriu no kualidade implementasaun projetu no buka hatene no fahe informasaun kona-ba serbisu interligadu entre instituisaun Estadu iha kada munisípiu.
Eis Prezidente Autoridade Munisipál Baukau ne’e argumenta katak liuhosi atividade ne’e, ekipa asisténsia téknika mós sei buka hatene maneira sistema digitalizasaun iha kada postu administrativu sira hanesan utilizasaun ekipamentu IT ne’ebé iha interligadu serbisu entre postu bá suku, postu bá AAM inklui serbisu munisipál sira.
“Sira-ne’e hotu atu fortifika papél serbisu Governu sentrál nian ne’ebé kredivel no forte liután hodi prepara aan di’ak liután ba avaliasaun kondisaun mínima iha oin mai,” António Guterres esplika.
Nia fundamenta, liuhosi prestasaun serbisu sei kontinua bá avaliasaun kondisaun mínima hanesan infraestrutura, administrasaun, planeamentu, jestaun finansa, formasaun rekursu umanu liuhosi módula INAP antes hakat bá implementasaun lei podér lokál no desentralizasaun administrativa.
Tuir planu, hafoin lansa ekipa asisténsia téknika ba prestasaun serbisu, sei hahú dezkloka bá kada munisípiu iha loron 15 to’o 19 no sei enserra iha loron 20 fulan ne’e hodi hakbesik ba serbisu administrasaun lokál, serbisu aprovizionamentu, toponímia, finansa liuliu rona no fó asisténsia bainhira munisípiu sira presiiza tulun.
Programa ekipa asisténsia téknika ba prestasaun serbisu AAM no Autoridade Administrativa Ataúru lansa husi Ministra Edukasaun, Dulce de Jesus Soares no partisipa husi Prezidente Autoridade Munisipál, Sekretáriu Munisipál, Administradór Postu Administrativu inkui kargu xefia iha MAE.
Jornalista: Natalino Belo
Editór: Xisto Freitas da Piedade
