DILI, 12 Juñu 2025 (TATOLI)–Primeiru-Ministru (PM), Kay Rala Xanana Gusmão, Kinta ne’e, hasoru malu ho Prezidente Repúblika (PR), José Ramos Horta hodi aprezenta kona-ba Governu nia preparasaun ba elaborasaun proposta Orsamentu Jerál Estadu (OJE) 2026.
“Ha’u informa ba Prezidente Repúblika katak aban ami sei hala’o reuniaun hodi prepara orsamentu ba tinan 2026,” Xanana hateten hafoin remata reuniaun ho Xefe Estadu, iha Palásiu Prezidensiál, Bairru Pité.
Xanana dehan, maski hakat ona ba faze preparativu OJE 2026 maibé sei iha problema boot tanba iha instituisaun barak sei odota nafatin sistema husi Governu anteriór.
“Sei iha problema boot tanba fatin barak sei kaer hela sistema VIII Governu nian ne’ebé rai hela, maibé fundamentál tebes ba ita se kaer osan ho di’ak Estadu bele la’o ba oin,” Xanana akresenta.
Implementasaun poder lokál
Aleinde ne’e, Xefe Governu relata mós ba PR kona-ba desizaun Konsellu Ministru horisehik, atu hahú implementasaun poder lokál no desentralizasaun administrativa iha munisípiu hotu, ne’ebé Governu foku liu ba rekursu umanu ne’ebé atu halo serbisu.
“Ita haree kada munisípiu nia Prezidente Autoridade ne’e nia oan mak kaer, maibé ita agora haree liu ba rekursu umanu hodi prepara-an ba Governu lokál ne’e, iha administrasaun, finansa, no planeamentu,” nia tenik.
Notísia relevante : Oekusi-oan tenke unidade hodi simu desentralizasaun administrativa no podér lokál iha 2027
Xefe Governu konta tuir, bainhira halo vizita bá Oékusi, iha Oékusi-oan balun lamenta ho desizaun Governu sentrál.
“Ha’u bá iha ne’ebá dala-rua tanba sira lamenta kona-ba Governu prepara munisípiu seluk nia oan nusa la prepara mós sira, ne’ebé desizaun horiseik iha Konsellu Ministru deside sira atuál ne’ebé lidera hela Oékusi ne’e ramata iha Sembru, liu ne’e ita fó fali ba Atoni nia oan sira mak kaer rasik sira-nia rai,” Xanana hateten.
Tanba ne’e, hahú fulan-Outubru ba oin, Oekusi-oan mak sei kaer no jere rasik sira-nia administrasaun hodi dezenvolve Oékusi sai hanesan zona ekonomia espesiál no estrutura atuál sei termina mandatu iha fulan-Setembru.
Jornalista : Hortencio Sanchez
Editora : Julia Chatarina
