DILI, 23 Juñu 2025 (TATOLI)-Ministériu Ensinu Superiór Siénsia no Kultura (MESSK), rekruta voluntáriu 300 ne’ebé maihusi estudante Institutu Ensinu Superiór (IES) ba jogu Komunidade husi Nasaun sira ne’ebé ko’alia lian-portugés (CPLP-sigla portugés) iha Jullu ne’e.
“Ita rekruta voluntáriu ema hamutuk 300 hodi akompaña atleta sira iha jogu CPLP”, Ministru MESSK, José Honório, hatete ba TATOLI iha nia knaar fatin Kolmera, ohin.
Ministru dehan jogu ne’e Ministériu Juventude Desportu no Kultura (MJDK) mak organiza, ne’ebé atu akompaña atleta sira tanba atleta sira ne’e maihusi komunidade lian-portugés, entaun presiza ema ne’ebé hatene dalen referida.
“Maibé atu ba akompaña tenke liuhusi teste, nune’e atleta karik sira husu kona-ba istória Timor, fatin turismu karik sira bele esplika”, nia dehan.
Governante ne’e mós dehan prosesu rekrutamentu la’o hela. Agora sei koordena ho MJDAK atu entrega, nune’e fulan-Jullu voluntáriu sira bele hala’o sira-nia knaar.
“Prosesu la’o hela agora iha hela faze entrevista, hotu sei entrega ofisialmente ba MJDK bainhira ita-nia atleta sira to’o iha Timor”, MESSK konklui.
Notísia relevante: SEAK prepara estudante rihun-resin ba dansa abertura jogu CPLP
Jornalista : Osória Marques
Editora : Rita Almeida
