DILI, 28 Maiu 2025 (TATOLI)–Sekretáriu Estadu Arte no Kultura (SEAK), Jorge Cristovão, hatete, SEAK prepara estudante sekundáriu rihun-resin mak sei dansa kolosál iha abertura jogu desportu Komunidade husi Nasaun ne’ebé ko’alia lian-portugés (CPLP-sigla portugés).
“Ami ho Ministériu Edukasaun prepara hela ba abertura jogu CPLP, nune’e ami identifika ona eskola sekundária sanulu hodi aprezenta dansa iha abertura jogu CPLP nian”, Governante ne’e afirma ba TATOLI liuhosi telefone, ohin.
Sekretáriu Estadu hatutan, komisaun organizadora rekruta ona estudante sira hodi dansa iha abertura jogu CPLP.
Nia hatutan, dansarina sira ne’e pertense ba eskola São João Paulo II, 28 Novembru, São Pedro, Eskola Téknika Vokasionál, Canossa, 4 de Setembro, Paulo VI, CAFE, Eskola Téknika Vokasionál Ospitalidade no Eskola Téknika Vokasionál Komérsiu.
“Ami rekruta ema hamutuk 1.040 ba ami nia ekipa komisaun eventu nian. Ami servisu ho grupu dansa sira hanesan Santo António, Weliku Wehale, Le’e-iaval, Timor Furak. Ekipa ne’e sei fó hela formasaun”, nia dehan.
Jorge Cristovão haktuir dansadór sira hahú fahe ba grupu hodi hahú prátika dansa sira no sira konsentra iha fatin tolu tanba ema barak.
Nia dehan kona-ba tipu dansa sira ne’ebé atu aprezenta iha abertura eventu jogu CPLP ne’e, seidauk bele fó sai bá públiku.
“En-prinsípiu, ha’u seidauk bele fó sai tipu dansa sira, tanba ami hakarak aprezenta hanesan surpreza ida ba ita-nia maun-alin sira iha jogu CPLP. Maibé sei iha hela faze preparasaun”, dehan nia.
Ministru Juventude, Desportu, Arte no Kultura, Nelyo Isaac Sarmento, hateten liuhusi eventu ida-ne’e promove mós talentu estudante sekundáriu sira nian.
“Ita iha estudante sekundária rihun ida resin hala’o dansa iha abertura eventu jogu CPLP”, nia dehan.
Notísia relevante: Governu Hili Lia-Na’in Uma-Lisan Tolu Partisipa iha Abertura Jogu CPLP
Jornalista : Osória Marques
Editora : Rita Almeida
