KOVALIMA, 24 Juñu 2025 (TATOLI) – Eskola Bázika Sentrál Filiál (EBF) Hare-kain menus profesór disiplina tolu hanesan Matématika, Língua portugeza no Relijiaun.
“Alunu iha EBF 174 ho manorin na’in-lima tanba ne’e ami menus rekursu hanesan manorin tanba manorin na’in ida bele akumula alunu husi sala-de-aula rua”, Diretór Eskola Bázika Sentrál Beilaku, Hilario Magno informa ba jornalista, iha Kovalima, ohin.
Ho situasaun ne’e, eskola referida, profesór na’in tolu fasilita atividade letiva ba alunu sira – primeiru no segundu siklu, iha sala-de-aula neen.
Tanba ne’e, autoridade eskolar estabelesimentu ensinu ne’e rekomenda ba Ministériu Edukasaun atu buka solusaun problema ne’e.
Notísia relevante: https://tatoli.tl/2025/03/06/me-inaugura-no-entrega-xave-eskola-tolu-iha-kovalima/
Iha parte seluk, alende menus profisionál edukasaun sira maibé kondisaun eskola hanesan iha tempu udan nakonu ho bee, la iha bee dalan no la iha bee-moos, tuir relatóriu husi dirijente eskola.
“Ami kuru bee posu bainhira atu asesu bee presiza la’o ain kilometru ida foin bele asesu bee hodi ba kuru bee iha posu”, nia informa.
Iha sorin seluk, Diretora Servisu Munisipál Edukasaun Kovalima, Elda de Fátima klarifika katak la’ós eskola ida de’it mak menus profesór maibé eskola hotu iha Kovalima menus profesór atu hanorin alunu sira.
Nune’e, Autoridade edukasaun Kovalima hato’o ona pedidu ba nasionál atu bele haree problema ne’e.
“Ami hato’o ona pedidu tanba tuir dadus profesór ba ensinu báziku hamutuk120-resin tanba ne’e la’ós eskola ida de’it mak menus profesór maibé eskola hotu kedas”, nia haktuir.
Durante ne’e, Ministériu Edukasaun koloka ona profesór mai iha munisípiu Kovalima hamutuk 56 ho nune’e profesór ne’ebé tama idade reforma sira nafatin reforma.
Dirijente edukasaun ne’e klarifika, daudaun ne’e kada eskola profesór tama iha lista reforma balun na’in-rua no balun na’in-haat ho nune’e eskola públiku sira menus manorin-na’in.
Foin lalais iha eskola Foho Lulik koordenadór mesak mak hanorin alunu primeiru ano no to’o sestu ano. “Maske sirkulár labele koloka profesór arbiru maibé ha’u muda profesór husi eskola Soiliga ba hanorin iha eskola Foho Lulik”, nia informa.
Razaun eskola hotu menus profesór tanba profesór sira balun tama ona iha lista reforma no moras prolongadu.
Tuir dadus, profesór moras prolongadu 32 ne’ebé lista haruka ona ba nasionál no edukasaun mós kontinua simu despaixu husi Funsaun Públiku hodi hapara sira.
Manorin ne’ebé mak tama iha lista reforma ba 2025 ne’e 110-resin balun seidauk maibé haree ba sira-nia idade reforma ona nune’e hanorin alunu “Dia sim ho não”. Katak, loron ida tama no loron ida lae.
Totál profesór iha Kovalima hamutuk rihun ida-resin no husi númeru ne’e profesór 110-resin tama ona iha lista reforma no profesór 970-resin mak ativa hanorin alunu iha Kovalima tanba ne’e presiza koloka tan profesór 130-resin.
Notísia relevante: https://tatoli.tl/2025/04/22/me-konstrui-ona-ebf-aitoun-iha-fatululik/
Jornalista:Celestina Teles
Editór: Rafael Ximenes de A. Belo
