DILI, 29 juñu 2025 (TATOLI)– Múzika Keroncong ne’ebé konesidu iha Indonézia sai hanesan símbolu forte ba identidade kulturál povu Kampung Tugu, Jakarta Norte, ne’ebé moris to’o ohin loron.
“Lian portugés ne’ebé uza iha konversa no adorasaun loroloron, no mós múzika krontjong ne’ebé dezenvolve husi múzika fado urbana portugés nian, ne’ebé sai nu’udar manifestasaun reál husi relasaun emosionál no istóriku husi komunidade Tugu ho sira-nia bei’ala sira”, hateten Profesór Daya Negri Wijaya husi Departamentu Istória, Fakuldade Siénsia Sosiál, Universidade Negeri Malang iha Konferé nsia Komunidade Aziátika Portugál (APCC) ba dala haat, iha Sentru Konvensaun Dili (CCD-sigla portugés), Dili, ohin.
Notisia relevante:Komunidade Kudichin husi Tailándia aprezenta vestuáriu istóriku iha APCC 2025
Profesór ne’e esplika múzika no lian sai hanesan elementu prinsipál hodi forma identidade sosiál komunidade desendente Portugés iha Kampung Tugu.
Nia esplika diferensa entre “Krontjong” no “Keroncong”, iha ortografia no kontestu uza nian. Krontjong maka ortografia Olandés ba múzika keroncong, enkuantu Keroncong maka ortografia Indonézia ba tipu múzika ne’ebé hanesan. Múzika Krontjong iha Kampung Tugu mai hosi múzika fado, ne’ebé maka lori hosi mariñeiru portugés sira iha sira nia viajen ba Ázia hahú hosi sékulu XVI.
Komunidade Tugu sira adapta estilu múzika ida-ne’e ho instrumentu lokál sira hanesan tamborin no guitarra, hodi kria estilu krontjong ne’ebé distintivu ne’ebé agora sai hanesan íkonu ida ba sira nia kultura. Instrumentu múzika ki’ik ida ho talin haat ne’ebé hanaran cavaquinho maka instrumentu prinsipál ne’ebé uza hodi toka melodia romántiku no poétiku sira ne’ebé típiku ba krontjong.
“Liafuan ‘krontjong’ ne’e rasik mai husi lian ‘crong’ ne’ebé prodús bainhira toka guitarra”, Profesór Daya esplika.
Múzika Krontjong hanesan elementu importante ida iha tradisaun sira komunidade Aldeia Tugu nian. Ida mak tradisaun rabo-rabo, ne’ebé mai husi lia-fuan portugés “rabo” (atu halo tuir), ne’ebé aldeia-oan sira la’o hale’u hananu krontjong hodi hato’o ksolok ba tinan foun husi uma ba uma.
Atividade ida ne’e selebra kada tinan ne’ebé monu iha loron 1 Janeiru. Normalmente tuir fali ho tradisaun haris (mandi-mandi), inklui husu perdaun no ho orasaun no diskursu husi katuas tradisionál sira.
Melodia sira ne’ebé famozu balun inklui Moresco, Nina Bobo, Kafrinyu, no Prounga. Knananuk sira reflete pegada multikulturál hosi múzika Tugu nian kombina elementu portugés, afrikanu, árabe no malaiu iha armónia ida de’it.
Iha tinan 1978, Lia na’in Portugés Jacob Quiko mate, iha Kampung Tugu, lian portugés sai hanesan instrumentu ba múzika Krontjong nian.
Maski nune’e, komunidade koko nafatin atu prezerva patrimóniu ida-ne’e liuhosi aprezentasaun múzika, aprezentasaun dansa Noni Tugu, no knananuk sira ne’ebé kahur nia instrumentu Malaiu, Olanda, no Portugés.
Mezmu forma múzika nakloke hanesan tanjidor, ne’ebé nia abut iha termu portugés tanger (toka instrumentu múzika ida), dezenvolve nu’udar parte hosi espresaun kulturál komunidade Tugu nian.
“Múzika no linguajen la’ós de’it hanesan ferramenta divertimentu ka komunikasaun, maibé hanesan meiu ida atu mantein memória koletiva no hametin identidade sosiál,” Profesór Daya dehan.
Prezensa hosi naran portugés sira hanesan de Silva, da Costa, no Caldero iha família Mardika (naran ba desendente portugés sira iha lian Tugu), no mós influénsia hosi portugés iha vokabuláriu olandés no malaiu, hatudu oinsá abut kulturál sira-ne’e metin kle’an.
Múzika Krontjong mós pasa ona liuhosi prosesu ida enkulturasaun nian entre jerasaun sira, hodi halo ida-ne’e la’ós de’it divertimentu maibé mós hanesan lembransa ida kona-ba istória no eransa bei’ala sira nian ne’ebé maka moris nafatin to’o ohin loron modernu iha Indonézia.
Alende ne’e sira naftain perserva kulturál aihan moda hosi atu refleta ba identidade tugu sosiál nian tanba ida-ne’e hanesen identidade kultura sira-nia.
“Hahán espesiál sira hanesan etu tein ho boek, bolo camarão banana, apem kinca, no pindang serani ilustra fuzaun hosi hahán Portugés, lokál, no Betawi. La’ós ida-ne’e de’it, hahán europeu sira hanesan espageti, roulade, no tarte ho manu-tolun mós halo parte iha tradisaun kulinária iha selebrasaun família nian, liuliu iha Natál”, nia dehan.
Nia hatutan tan, hatais tradisionál hosi Tugu Indonézia hatuan bá patrimóniu kultura portuguesa nian. Sira nian istilu hatais mak
kombina elementu portugés, olandés no lokál, hanesan blusa liman luan, saia naruk no pimenta-mutin ho influénsia husi europeia
“Moda ida ne’e la’ós de’it hatudu influénsia istórika sira, maibé mós sai hanesan identidade vizuál husi komunidade multikulturál Mardika nian”, nia dehan.
Kultura Materiál mak igreja sira no Fatuk-kuak sira hanesan Markadór Patrimóniu nian. Igreja Tugu no rate sira ne’ebé hale’u nu’udar símbolu forte ba identidade no memória koletiva komunidade Tugu nian. Harii iha sékulu XVII, igreja ne’e sai nu’udar sentru relijiozu no edukativu ne’ebé mantein lian no kultura portugés, maski depois sai parte Igreja Protestante Indonézia nian.
Notisia relevante:Dansa tradisionál “Toja Bobu Ballet“ atrai bainaka internasionál iha APCC
Jornalista : Osória Marques
Editór: Florencio Miranda Ximenes
