DILI, 01 Jullu 2025 (TATOLI)—Ministériu Saúde (MS) Servisu hamutuk ho Menzies iha Timor-Leste sei lansa programa Wolbachia iha 20 Agostu, tinan ne’e, iha Dili.
“Tuir loloos ita halo lansamentu iha fulan-Jullu ne’e, maibé ita-nia ekipa sira sei halo preparasaun téknika, entaun ita muda ba 20 Agostu,” Vise-Ministru Saúde ba Asuntu Fortalesimentu Instituisionál Saúde, José dos Reis Mango hateten ba jornalista sira, iha Kaikoli, tersa ne’e.
Nia dehan, iha semana hirak liubá, Ministra Saúde no Primeiru-Ministru fó autorizasaun ba Vise-Ministru Fortalesimentu Instituisionál Saúde ho ekipa ida bá halo observasaun ba susuk sira ne’ebé mak husik iha Austrália no iha-ne’eba haree katak susuk sira-ne’e dezenvolvidu kapa’as loos no tempu badak sei lori mai Timor-Leste.
“Loos. Ha’u ho ekipa ida bá observa ita-nia susuk tolun ne’ebé mak lori bá haki’ak iha Melbourne, Austrália. Susuk hirak-ne’e dezenvolvidu kapa’as loos no Menzies prepara atu transporte mai Dili iha 20 Agostu,” nia informa.
Notísia relevante: Jullu, MS implementa programa Wolbachia iha Dili
Nia informa, programa ida-ne’e la’o, tanba hetan persentajen di’ak, ne’ebé mak durante ne’e advokasia ba komunidade sira hotu kuaze 90% aseita atu implementa programa ida-ne’e.
Antes ne’e, Reprezentante Menzies iha Timor-Leste, Nelson Martins, informa programa ida World Mosquito Program (WMP Sigla Ingles) no Action One Proverty (Aop) hahú implementa programa Walbachia iha Timor-Leste hodi hamenus tranzmisaun moras dengue no chikungunya.
“Ne’e hanesan parte ida husi ami-nia kompromisu ba transparénsia no envolvimentu komunidade nian. Ami halo kampaña sosializasaun ida hodi informa no eduka públiku kona-ba benefisiu husi programa ida-ne’e,” Nelson Martins tenik.
Jornalista: Felicidade Ximenes
Editór: Xisto Freitas da Piedade
