DILI, 01 Jullu 2025 (TATOLI)-Sekretaria Estadu Igualdade (SEI) ho Asosiasain Feto Munisípiu (AFM) asina akordu subvensaun públiku husi Orsamentu Jerál Estadu (OJE) 2025 ba munisípiu 12 inklui RAEOA no mós parséria Organizasaun Naun Governamentál sira ho objetivu prinsipál rua.
Sekretária Estadu Igualdade, Elvina de Sousa Carvalho, hateten objetivu ne’e parte ida atu hametin relasaun di’ak entre SEI ho parseiru sira hodi promove igualdade jéneru no prevensaun violénsia hasoru feto no labarik feto iha Timor.
“Akordu ida-ne’e sei haree kona-ba polítika ne’ebé hakbiit feto iha poténsia foti desizaun ba violénsia bazeia ba jéneru no oinsá atu nafatin hamoris asaun feto hodi tau matan ba feto maluk sira seluk”, dehan nia ba jornalista sira iha salaun Maria Gorete SEI, Kaikoli, ohin.
Objetivu seluk mak hasa’e abilidade no koñesimentu hodi enkoraja no motiva feto sira nia partisipasaun iha prosesu dezenvolvimentu no hasa’e partisipasaun feto iha polítika foti desizaun ba preprasaun eleisaun kámara munisípiu (dezentralizasaun no poder lokál).
“Maske fundu ne’ebé ami fó ho montante kiik, maibé durante ita boot sira halo servisu no ha’u hatene katak ita boot sira bele jere ho oinsá osan ne’ebé iha bele implementa ho efetivamente. Asegura relatóriu ne’ebé mak di’ak no asegura mós relatóriu ba hakbiit feto nia politikamente”, governante ne’e realsa.
Orsamentu ne’e sensibiliza, formasaun ba feto sira-nia preparasaun bainhira partisipa iha prosesu dezentralizasaun poder lokál ho montante $4.000 mil maibé diferente ho Dili ne’ebé Governu aprova ho montante $5.500.
Enkuantu orsamentu subvensaun públiku ne’ebé fó ba ONG sira ho montante $59.000.00, ne’ebé kompostu husi organizasaun 10 hanesan, Kodiva $4.000.00, JLHFS-TL $2.000.00, Fundasaun Alola $8.000.00, KDT-TL $3.000.00, GFPL $15.000.00, ADFL $3.000.00, ALFeLa $8.000.00, AHMDTL $3.000.00, FOKUPERS $8.000.00.
Notísia relevante: SEI tinan ne’e atribui ajudu ba Asosiasaun Feto sira iha munisípiu
Jornalista : Alexandra da Costa
Editora : Rita Almeida
