DILI, 10 Jullu 2025 (TATOLI) – Ministru Agrikultura, Pekuária, Peska no Floresta, Marcos da Cruz, hateten stock vasina antirrábika sufisiente atu halo vasinasaun ba asu sira iha territóriu.
Ministériu Agrikultura, Pekuária, Peska no Floresta (MAPPF), liuhusi Diresaun Nasionál Veterinária,daudaun iha stock vasina hamutuk doze rihun 100.
Haree ba vasina ne’ebé disponivel hela, ministru husu ba komunidade tenke koopera ho MAPPF lori asu sira bá vasina iha postu movel sira ne’ebé prepara ona no mós lori direta bá ministériu atu parte Veterinária sira bele fó vasina.
“Ami mós destaka ona pesoál veterenária iha fronteira sira hodi implementa programa vasinasaun animál iha ne’ebá”, governante dehan iha Palásiu Governu.
Nia esklarese katak, tuir informasaun ne’ebé fó sai iha mídia kona-ba asu 12 pozitivu ho raiva iha Aileu ne’ebé halai lakon ne’e laloos.
Bazeia ba relatóriu, husi Janeiru to’o Juñu 2025, Veterinária vasina ona asu hamutuk 1.557. Iha 2024, dadus hatudu MAPFF vasina ona animál 52.524, husi númeru ne’e asu 48.745, busa 3.530 no lekirauk 249.
Notísia relevante : https://tatoli.tl/2025/06/30/ms-apela-ba-komunidade-neebe-hakiak-asu-tenke-lori-ba-vasina/
Jornalista: Arminda Fonseca
Editora: Maria Auxiliadora
