DILI, 12 Jullu 2025 (TATOLI)—ETO Group liuhusi ninia subsidiáriu empreza Ti-oan oferese osan ho montante $100.000 ba jogadora ekipa selesaun nasionál feto.
“Bonus referidu la’ós primeira vez, ba selesaun mane ne’e ita realiza ona, ne’e ba segunda vez nian ba selesaun feto,” Reprezentante empreza Ti-oan, Edmundo Freitas Lopes, hateten hafoin entrega bonus iha edifísiu Federasaun Futeból Timor-Leste (FFTL), Bairru Formosa, Sábadu ne’e.
Inisiativa empreza nian ne’e hodi bele motiva liután jogadora selesaun nasionál feto.
“Ami hakarak valoriza selesaun feto, ne’ebé konsege halo buat ruma ba jogu referidu,” akresenta.
Nia husu ba ekipa selesaun nasionál feto atu hatudu prestasaun di’ak liután iha eventu ba jogu internasionál tuir mai hodi hamorin liután Timor-Leste nia naran iha mundu.
Notísia relevante : FFTL no ETO Group atribui prémiu apresiasaun $100.000 ba ekipa selesaun nasionál
Diretór Servisu Selesaun Nasionál FFTL, João Soares Amaral, hato’o agradesimentu ba Eto Group liuhusi ninia subsidiáriu empreza Ti-oan, ne’ebé oferese tan bonus ba selesaun feto.
“Ida-ne’e hodi apresia ba saida mak jogadora sira hala’o iha jogu liubá no espera bele motiva liután ita-nia jogadór iha rai-laran ne’ebé esforsu sira-nia an hodi hatudu buat ne’ebé mak di’ak liután iha futuru,” nia katak.
Reprezentante selesaun nasionál feto, Dolores Verdiana da Silva Costa, sente kontente ho apoiu ne’ebé oferese, nune’e bele uza hodi hatan ba nesesidade no fasilidade hodi dezenvolve liután talentu iha futebol nian.
“Ha’u iha esperansa, ba oin sira bele kontinua ho apoiu ne’e hodi bele lori rezultadu di’ak liu tan bainhira partisipa eventu internasionál iha futuru,” nia tenik.
Antes ne’e, ekipa selesaun nasionál feto seniór partisipa iha jogu kualifikasaun AFC Women’s Asian Cup Australia 2026, ne’ebé tama iha grupu B, hamutuk ho Tailándia, Índia, Mongolia no Iraq. Nune’e iha grupu B, Timor-Leste iha klasifikasaun 3 ho pontu 4.
Jogu ba grupu B, Tailándia mak sai hanesan uma-na’in, ne’ebé jogu ne’e realiza iha estádiu Chiang Mai, Tailándia.
Ekipa selesaun nasionál feto, lidera direita husi treinadór prinsipál, Emral Bustamam ho nia asistente sira, ne’ebé hala’o jogu iha Tailándia iha loron 23 Juñu joga hasoru ekipa Iraq ho rezultadu Timor-Leste 1-1 Iraq, iha loron 26 Juñu hasoru Tailándia ho rezultadu Timor-Leste 0-4 Tailándia, iha loron 29 juñu hasoru Índia ho rezultadu Timor-Leste 0-4 India, no iha loron 05 Jullu 2025, joga hasoru Mongolia ho rezultadu Timor-Leste 3-1 Mongolia.
Ekipa selesaun nasionál feto fila hikas ona mai Timor-Leste iha loron 07 Jullu 2025.
Jornalista : Nelson de Sousa
Editora : Julia Chatarina
