DILI, 18 Jullu 2025 (TATOLI)—Prezidente Federasaun Tenis iha Timor-Leste, João Martires, hateten Timor-Leste prepara atleta na’in-rua hodi partisipa iha modalidade tenis ba jogu desportivu Komunidade País Lian Portugés (CPLP) ba da-XII iha Timor-Leste.
“Molok ami simu informasaun katak tenis tama iha desportu CPLP, ami komesa prepara kedas. Ami harii komisaun ida depois ami loke torneiu iha ne’ebá mai hetan ema na’in-haat atu bele tuir treinamentu. Husi ne’e, na’in-rua mak ami prepara ba modalidade ida-ne’e tanba tuir regra katak presiza ema na’in-rua,” João Martires hateten ba Agência Tatoli iha kampu tenis UNTL sentrál, ohin.
Nia dehan, husi ne’e komesa atleta sira ba hela iha Hotel Ramelau ho treinadór sira ho ekipa rua maibe ami hili de’it ema na’in-rua (2) atu kompete iha jogu CPLP ne’e rasik.
“Husi treinu ne’e di’ak tebes. Ita envolve treinadór timoroan sira, entaun buat hotu halo ita-nia ema rasik. Ami-nia preparasaun di’ak tebes ba eventu ida-ne’e, tanba ami-nia preparasaun ne’e dezde fulan haat liu ba, no sira ba hela iha Hotel Ramelau hahú iha fulan-Abríl. Entaun, ami prepara sira atu sira tuir jogu ne’e,” nia dehan.
Nia haktuir, Federasaun Tenis ne’e hahú harii iha 2000 mai to’o agora no konsege ba kompete iha nasaun sira hanesan Indonézia, Austrália buka esperiénsia seidauk ba hatudu jogu.
“Ami buka esperiénsia maibé ami-nia foku ne’e ba Timor-Leste haree tenis hanesan fini. Ami hakarak hanorin kona-ba nutrisaun, dixiplina no saúde. Ami-nia rekezitu ida tan mak sira la eskola no sira labele joga, entaun ami enkoraja sira nafatin ba eskola liu liu labarik feto no mane sira atu partisipa,” nia informa.
Entretantu, atleta na’in-rua ne’ebé mak atu partisipa jogu tenis ne’e mai husi Munisípiu Dili.
Jornalista : Felicidade Ximenes
Editór : Cancio Ximenes
