DILI, 19 Jullu 2025 (TATOLI)—Adeptu Timor-Leste, Dahlio Sousa Pereira Gama, garante katak iha abertura jogu desportivu CPLP edisaun ba da-XII ne’e, ekipa futeból “Lafaek” Timor-Leste sei manon ho eskore 2-1 kontra Portugál.
Notísia Relevante: TL-Portugál prontu kompete iha abertura jogu desportivu CPLP
Dahlio Sousa Pereira Gama, hateten orsida iha abertura jogu CPLP nasaun rua ne’e sei harame estádiu Dili, tanba ita haree katak durante ne’e timoroan barak mak fanatiku (fens) Portugál tamba jogadór famozu Cristiano Ronaldo.
“Ha’u nafatin apoia jogadór timoroan tamba sira reprezenta ita-nia nasaun hodi kompete ho masaun seluk, maske ha’u gosta liu nasaun Argentina iha mundu futeból,” adeptu ne’e informa ba jornalista Tatoli iha Kampo Alor, Dili, ohin.
Nia dehan, nu’udár timoroan tenke promove nafatin ita-nia jogadór tamba sira mós kompete ona iha nivél internasionál, entaun sira mós hatudu ona sira-nia esforsu no talentu.
“Ita rasik mak tenke fó apoiu ba sira atu nune’e jogadór sira sente semangat hodi hatudu sira-nia performe ho di’ak iha kampu,” nia dehan.
Maske lakon ka manán importante ita hatudu ona katak Timor mós iha ninia jogadór estrela sira no iha espíritu ba mundu desportivu.
Jornalista : Alexandra da Costa
Editór : Cancio Ximenes
