DILI, 20 Jullu 2025 (TATOLI)—Atleta modalidade atletizmu husi Portugál prontu kompete iha jogu desportivu Comunidade dos Países da Língua Portuguêsa (CPLP) ne’ebé realiza iha Timor-Leste.
Notísia Relevante: Profisionál saúde husi Portugál apoiu MS fó atendementu ba atleta sira
Tékniku Nasionál Federasaun Atletizmu Portugál, Alcino Pereira, informa reparasaun ba sira-nia atleta durante tinan-haat ona no totál atleta selesionadu ne’ebé sei kompete iha modalidade atletizmu iha na’in-12 ne’ebé kompostu husi feto na’in-neen (6) no mane nain-neen (6).
“Eventu internasionál ida-ne’e importante tebes bele hetan esperiénsia tanba ita bele la’o lemorai liuliu bele koñese di’ak liután nasaun Timor,” Tékniku (leader) federasaun atletizmu ne’e hateten bs Agência Tatoli iha estádiu Munisipál Dili (SMD), sesta (18 Jullu 2025) ne’e.
Nia afirma, maske antes ne’e iha difikuldade viajen ne’ebé to’o tarde uitoan mai iha Timor, maibé sira sempre iha akompañamentu husi parte seguransa nian hodi partisipa iha jogu desportiva CPLP.
Reprezentante atleta atletizmu (maskulinu) Portugál, Samuel Vicente Amaro, idade 15, sente orgullu loos bele hetan oportunidade hodi partisipa iha kompetisaun jogu desportiva CPLP
“Ha’u fiar katak bele performe ho di’ak tanba durante ne’e ami-nia preparasaun ho durasaun tempu ne’ebé mak naruk no hetan estratéjia tátiku husi treinadór sira,” nia dehan.
Aleinde ne’e, nia konsidera kompetisaun ne’e la’ós atu manán de’it maibé oinsá kuda metin lasu amizade entre nasaun membru CPLP sira.
Reprezentante atleta atletizmu (femenina) Portugál, Laura Branco Jorge da Silva, idade 25, sente orgullu bele reprezenta Portugál hodi kompete iha jogu desportiva Timor-Leste, nune’e nia sei esforsu hodi hatudu performe ne’ebé mak di’ak durante kompetisaun.
“Maske seidauk kompete iha nivél intwrnasionál ka nasionál ruma, maibé ha’u prontu hasoru atleta sira seluk iha kampu,” nia hateten.
Nia garante ho preparasaun fízika ne’ebé durante ne’e nia hala’o husi hahú iha Portugál to’o mai iha Timor, entaun to’o ona iha Timor mós sira kontinua treinu nune’e bele garante performe ne’ebé kompetativu.
Jornalista : Alexandra da Costa
Editór : Cancio Ximenes
