OEKUSI, 21 Jullu 2025 (TATOLI) – Ekipa konjunta komposta husi Diresaun Rejionál Edukasaun Juventude no Desportu, Sekretáriu Rejionál ba Asuntu Saúde no Diresaun Rejionál Agrikultura, nota, ai-han tipu tolu iha implementasaun programa merenda eskolár iha Rejiaun Administrativa Espesiál Oekusi Ambeno (RAEOA) hatudu ijiene no nutritivu.
Notísia relevante:Primeira-vés asesu merenda eskolár, Eskola Katólika Padiae agradese Governu
Xefe Departamentu Apoia Asaun Sosiál Eskolár ba Asuntu Merenda Eskolár no Konseisaun Eskolár iha Edukasaun Oekusi, Sancia da Costa Neves, relata, atividade prinsipál husi ekipa konjunta ne’e, mak tau matan ba ai-han tipu tolu hodi garante nutritivu ba estudante.
“Durante ne’e ami la’o tama sai eskola observa, liuliu ba atendimentu, depois husu sira-nia esplikasaun kona-ba menu ne’ebé ekipa koziña sira prepara, ne’ebé laiha problema, ami sempre sujere atu nafatin uza ai-han tipu tolu mak hanesan, ai-han fó forsa, ai-han proteina no ai-han haburas. Ai-han tolu ne’e mak importante mai ami ekipa konjunta atu tuun observa direita, tanba nutriénte ne’e presiza duni ba ita-nia alunu sira, atu hasa’e sira-nia abilidade koñesimentu iha eskola,” nia dehan iha eskola Katólika Padiae.
Nia informa, atu kontrola implementasaun programa merenda eskolár ne’e, la’ós edukasaun mesak maibé saúde tau matan ba nutrisaun, agrikultura foku ba produtu lokál sira no Serbisu Água Saneamentu (SAS) haree ba bee-moos, karik hetan erru ka ladun la’o di’ak, ekipa sempre hakbesik no apoia liuhusi motivasaun.
Tanba Liuhusi programa merenda eskolár ne’e, fasilita eskola sira atu aumenta taxa ba iha ensinu apredizajen atu alunu sira labele abandona eskola, sira mós kontente nafatin hodi kontinua ba iha estabelesimentu ensinu.
“Ne’ebé, ai-han tipu tolu ne’ebé ekipa konjunta observa ba eskola sira hotu iha Oekusi, hatudu di’ak, signifika hahú husi tein to’o faze finál implementasaun la’o ho korridór ida, katak tenke fó ai-han di’ak ba ita-nia oan sira,” nia katak.
Notísia relevante:Edukasaun Oekusi aloka rihun $410-resin ba programa merenda eskolár
Sekretáriu Rejionál ba Asuntu Saúde Luís de Jesus Neno, relata, ekipa konjunta ne’e observa ho obejetivu atu kontribui redús kazu má-nutrisaun iha Oekusi, tanba Oekusi okupa fatin datoluk, kona-ba problema má-nutrisaun iha Timor-Leste.
“Serbisu saúde liuhusi departamentu nutritivu, halo monitorizasaun ba eskola sira-hotu, ohin ikus mak iha eskola Katólika Padiae, ne’ebé ami foku ba implementasaun liuliu ijiéne, hahán ne’ebé nutritivu, ami haree katak bazeia planu ne’ebé iha, ita presiza promove ai-han lokál sira, ida ne’e mak primeiru, hanesan fehuk, ai-farina, talas, husi no ai-han lokál seluk-tan, ida-ne’e bele hamenus má-nutrisaun tanba RAEOA rejista aas, nune’e ita kontinua tau matan ba implementasaun merenda eskolár ne’e,” nia dehan.
Notísia relevante:Ekipa Saúde observa merenda eskolár iha EBF 30 Agostu Masin falta ijiene
Lembra fali katak, antes ne’e Servisu Edukasaun Oekusi aloka rihun $410,496.66 husi Orsamentu Jerál Estadu (OJE) 2025 atu implementa progama merenda eskolár ho loron efetivu 53 ba Ensinu Pré-Eskolár (EPE) hamutuk 16, Ensinu Bázika Filiál (EBF)12 no Ensinu Bázika Sentrál (EBC, sigla portugés) hitu (7).
Programa ne’e alvu ba estudante 18.441 ba loron efetivu 53 ho totál orsamentu ne’ebé mak sai iha segundu períodu ne’e $410,496.66, kada estudante sei han $0,42 sentavus iha loron ida.
Jornalista: Abílio Elo Nini
Editór: Rafael Ximenes de A. Belo
