VIKEKE, 22 Jullu 2025 (TATOLI)—Abitante iha área Nuntetuk, Suku Uma Tolu, Postu Administrativu Lakluta, Munisípiu Vikeke hamutuk uma-kain 79 seidauk asesu ba enérjia eletrisidade.
Xefe Suku Uma Tolu, Eduardo Soares haktuir kuaze tinan naruk ona abitante Suku Uma Tolu ne’ebé hela iha área Nuntetuk nian seidauk asesu ba ahi (eletrisidade) ne’ebé sai hanesan dezafiu ba sira-nia nesesidade.
“Ita-nia komunidade Uma Tolu husi aldeia lima ne’ebé hela iha área Nuntetuk uma-kain hamutuk 79 to’o agora seidauk asesu ba ahi eletrisidade. Ida-ne’e sai hanesan problema ida ne’ebé ita-nia komunidade hasoru,” Eduardo Soares ba TATOLI iha Postu Lakluta, Tersa ne’e.
Nia dehan iha tempu kalan komunidade iha Nuntetuk depende ba lilin, lampuriña no sunu kamii hodi uza, difikulta mós estudante sira atu estuda iha tempu kalan.
“Ha’u hakarak rekomenda ba Governu hodi fó-atensaun ba komunidade ne’ebé preokupa ba ahi. Presiza dada ahi ba sira,” nia hato’o.
Iha fatin ketak, Sekretáriu Servisu Munisipál Asuntu Sosiál , Acasio de Sousa rekoñese katak populasaun Nunutetuk seidauk asesu ba eletrisidade no mós kondisaun estrada liga bá Nuntetuk grave hodi difikulta movimentu.
“Komunidade Nunutetuk nia estrada aat. Durante ne’e sira preokupa ba eletrisidade no estrada. Ha’u sei aprezenta ba Prezidente Autoridade Munisípiu Vikeke hodi prioriza iha Planu Asaun Anuál,” nia dehan.
Tuir dadus, pupulasaun ne’ebé hela iha Nuntetuk ne’ebé seidauk asesu ba eletrisidade totál uma-kain 79, totál populasaun hamutuk na’in-369 kompostu husi feto 179 no mane na’in-190, ema ho defisiénte na’in-4.
Jornalista: Vitorino Lopez da Costa
Editór: Xisto Freitas da Piedade
