OEKUSI, 22 Jullu 2025 (TATOLI) – Empreza internasionál Seagull Resort husi nasaun Malasia, arrenda otél Oé-Upun ba tinan-50 ho valór orsamentu millaun $9 atu loke jogu ‘online’ iha Oekusi, Prezidente Autoridade Rejiaun Administrativa Espesiál Oekusi Ambeno (RAEOA), Rogério Tiago Lobato.
“Jogu ‘game online’, ne’e Governu Sentrál mak sei fó autorizasaun, tanba Governu fó ona autorizasaun iha rai bo’ot tanba saida mak lakohi fó autorizasaun mai Oekusi. Ne’ebé, ita iha ona koordenasaun ho Governu Sentrál ho Vise-Primeiru Ministru, Ministru Turizmu no Ambiente nian, iha ona autorizasaun ba jogu online ne’e, maibé sei hein atu selebra akordu formál ida, tenke liuhusi lisensa legál ida ho Vise-Primeiru Ministru Turizmu ho empreza referida,” informa Rogério Lobato ba jornalista hafoin hala’o observasaun iha otel Oé-Upun, segunda ne’e.
Notísia relevante:Emprezáriu Singapura-Indonézia sei vizita Oekusi hodi avalia terrenu ba investimentu
Rogério Lobato, la informa detallu kona-ba tipu jogu online ne’ebé sei estabelese iha Oekusi, maibé empreza halo ona kontratu arrendamentu ho Autoridade RAEOA liuhusi Sekretáriu Rejionál ba Asuntu Terra no Propriedade.
“Ita halo kontratu arrendamentu ho empreza ne’e husi Malázia hala’o investimentu privada iha Oekusi, empreza selu millaun $9 ba Estadu liuhusi konta bankaria RAEOA nian, maibé selu ho fazeadamente, daudaun ne’e selu ona millaun $4, hela miilaun $5,” nia informa.
Nia esplika, husi orsamentu millaun $9 ne’e, empreza hatama ba Estadu atu rekupera fila-fali osan ne’ebé antes ne’e autoridade anteriór gasta ona millaun $14 atu hadi’a otél Oé-Upun, maibé ikusmai husik de’it laiha mudansa.
“Agora sira (kompañia) investe rasik sira-nia osan atu halo otél ne’e to’o kuartu 400 no investe millaun $50, ohin, sira kompañia informa mai ha’u, oras ne’e daudaun konstrusaun halo uluk kuartu 72, tuir planu sei finaliza iha fulan-Setembru, tanba kuartu 72 ne’e komposta ho tipu oioin, hanesan mini-market, restaurante, no fatin animasaun seluktan,” nia dehan.
Notísia relevante:Horta propoin atu RAEOA-ZEEDOA fó importánsia ba turizmu no otél
Reprezante empreza internasionál Seagull Resort, Mr.Huang, hato’o agradesimentu tanba bele hetan vizita husi Autoridade RAEOA, nune’e bele enkoraja empreza atu aselera servisu.
“Obrigadu ba vizita husi Prezidente Autoridade RAEOA no ba Governu nia apoiu. Durante enkontru, ami informa ba Prezidente Autoridade RAEOA kona-ba progresu projetu ne’e nian. Ami agradese tanba observa no haree rasik, no enkoraja ami atu kompleta lalais, oras ne’e daudaun kompañia rekruta hela traballadór lokál ba projetu ne’e, ho ema na’in-80, maioria husi Oekusi-oan, no na’in-64 ba administrasaun nian, tuir planu ba oin, ami hakarak rekruta ema liu 1,000, no iha futuru atividade ne’ebé hala’o iha otél ne’e, mak costumers service online – servisu atende kliente online (red)”, nia informa.
Notísia relevante:Empreza hosi Singapura investe millaun $600 atu dezenvolve otél Ambeno
Jornalista: Abílio Elo Nini
Editór: Rafael Ximenes de A. Belo
