DILI, 28 Jullu 2025 (TATOLI)–Ministériu Edukasaun (ME) liuhosi Sekretáriu Estadu Ensinu Sekundáriu Jerál no Ensinu Tékniku Vokasionál (ESJ-ESTV), Domingos Lopez Lemos prefere kada eskola rekruta guarda seguransa hodi asegura eskola.
Domingos Lopez Lemos hateten presiza iha planu ba orsamentu, tanba la’ós rekruta de’it ema ida hodi koloka iha-ne’ebá.
“Ida-ne’e tenke iha planu orsamentu, tanba la’ós rekruta de’it sein iha orsamentu,” nia dehan ba jornalista sira iha resintu Ministériu Negósiu Estranjeiru no Kooperasaun (MNEK), Praia dos Coqueiros, Dili, Segunda ne’e.
Notísia relevante: Ema deskoñesidu sobu odamatan EBC 10 Dezembru foti fasilidade eskola
Nia rekoñese katak eskola barak mak iha ona guarda seguransa, ne’ebé provizoriamente sira halo hela sira-nia servisu nu’udár guarda eskola, maibé eskola balun mak sei enfrenta hela difikuldade ba guarda referida.
Governante ne’e informa tempu besik sira sei rezolve guarda seguransa iha eskola sira hotu, maibé sei hein to’o jestaun eskola hodi konsolida inan-aman sira liuliu Conselho dos Pais iha eskola atu fó mós responsabilidade ba sira.
Antes ne’e, iha 15 Jullu liubá, Diretór Eskola Ensinu Báziku Sentrál (EBC-sigla portugeza) 10 Dezembru Komoro, Calistro Guterres hateten ema deskoñesidu sobu odamatan eskola EBC 10 Dezembru hodi foti sasán eskola nian balun.
“Ema deskoñesidu sobu odamatan armazein foti aisár, balde inklui tinta masa ida. Husi akontesimentu ne’e, parte eskola kontatu kedas Edukasaun Munisípiu Dili no obriga Inspetór Edukasaun to’o kedas iha fatin akontesimentu hodi buka maneira oinsá aprosima komunidade besik eskola kona-ba kazu ne’e,” nia haktuir.
Diretór ne’e husu ba Ministériu Edukasaun atubele koloka seguransa tanba iha-ne’ebá eskola rua maibé seguransa ida de’it no seguransa mós husi ema li’ur mak mai, mai mós loron de’it, kalan laiha.
Jornalista : Osória Marques
Editora : Julia Chatarina
