Ema deskoñesidu sobu odamatan EBC 10 Dezembru foti fasilidade eskola
DILI, 15 Jullu 2025 (TATOLI)–Diretór Ensinu Báziku Sentrál (EBC-sigla portugeza), Calistro Guterres haktuir iha ema deskoñesidu sobu odamatan EBC 10 Dezembru Komoro hodi foti sasán eskola nian balun.
Responsavel ne’e hateten akontesimentu referidu akontese iha Domingu (14/07) kalan no kontinua iha segunda kalan.
“Ema deskoñesidu sobu odamatan armazein eskola hodi foti aisár, balde inklui tinta masa ida,” Diretór EBC 10 Dezembru ba jornalista sira iha nia kna’ar fatin, Komoro, Tersa ne’e.
Nia dehan ho akontesimentu ne’ebé iha, parte eskola kontata kedas Edukasaun Munisípiu Dili, nune’e Inspetór Eskolár to’o iha fatin akontesimentu hodi buka maneira oinsá aprosima komunidade besik eskola kona-ba kazu ne’e.
“Ita bele hateten katak deskoñesidu, tanba ohin ami bá identifika iha merkadu laran, hetan sasán balun ami koñese katak sasán ne’e eskola nian. Ema ne’ebé mak lori bá ne’e ita haree más la kaer ho liman, entaun ami husu para sasán hirak-ne’e bele entrega fali mai eskola iha tempu badak,” Calistro informa.
Dirijente eskola ne’e adianta sasán hirak-ne’ebé lakon, daudaun ne’e sei iha ema balun nia fatin, tanba ohin parte eskola hamutuk ho inspetór inklui Ofisiál Polísia Suku (OPS) bá aprosima ona ho uma-na’in.
“Uma-na’in ohin hateten katak sasán ne’e dadeersan ami hadeer mai iha ona baranda, maibé ami la haree feto mak lori mai ka mane mak lori mai. Entaun, sasán ne’e sei asegura iha nia uma, ami hasai tiha foto no ami dehan ba uma-na’in katak responsabilidade ita-boot nian. Ita-boot aprosima took labarik sira, karik sira mak halo buat sira-ne’e, favór ida entrega filafali bá eskola,” nia fó-hanoin.
Calistro mós husu ba Ministériu Edukasaun atubele koloka seguransa, tanba iha-ne’ebá iha eskola rua maibé seguransa ida de’it, no seguransa mós ema li’ur mak mai, no mai mós loron de’it, kalan laiha.
Iha biban ne’e, Inspetór Eskolár Munisípiu Dili, Octavio Amaral Pinto hateten seguransa iha Eskola 10 Dezembru ida de’it no hala’o nia kna’ar iha parte loron de’it, kalan fatin ne’e mamuk, laiha ema ida atu tau-matan.
Tuir observasaun inspetór katak presiza aumenta seguransa iha-ne’ebá ba kalan no loron, tanba iha kalan laiha ema ida atu tau-matan ba edifísiu sira-ne’e.
Octavio aprofunda ohin rekolla hotu ona dadus, sei bá relata iha Inspesaun Edukasaun Munisípiu Dili atubele tetu hamutuk tanba inspetór labele foti desizaun atu koloka seguransa ohin ka aban.
Jornalista : Osória Marques
Editora. : Julia Chatarina
