DILI, 29 Jullu 2025 (TATOLI)—Sekretáriu Estadu Komunikasaun Sosiál (SEKOMS), Expedito Dias Ximenes, informa SEKOMS no Coelho Ribeiro Associados Timor (CRAT, sigla portugés) halo ona revizaun ba Lei Komunikasaun Sosiál ne’e finaliza ona.
Nia hatutan, iha semana ne’e nia laran, SEKOMS sei konvoka enkontru ho Conselho Imprensa Timor-Leste (CITL, sigla portugés) hodi haree kona-ba revizaun ba lei refere antes submete ba reuniaun Konsellu Ministru.
Notísia Relevante: Editór no Jornalista nia esperansa ba alterasaun lei Komunikasaun Sosiál
“Entaun, ami hein hela iha semana ida-ne’e tanba sira sei okupadu uitoan,” Sekretáriu Estadu Komunikasaun Sosiál, Expedito Dias Ximenes, hateten ba jornalista sira iha salaun Maria Gorete SEI, Kaikoli, ohin.
Expedito hatutan, aleinde ne’e bainhira revizaun lei ne’e lós ona, faze tuir mai sei lansa diskusaun ba públiku hodi konvida mídia-na’in, editór senior, akadémiku no organizasaun jornalista sira hodi fó hanoin hamutuk molok lori ba aprezenta iha Konsellu Ministru.
“Hafoin bele submete fali ba Parlamentu Nasionál hodi halo aprovasaun, no kontinua lori ba Prezidente da Repúblika hodi promulga,” ni dehan.
Notísia Relevante: TLPU-UPJTL nia esperansa ba alterasaun lei komunikasaun sosiál
Jornalista : Alexandra da Costa
Editór : Cancio Ximenes
