DILI, 31 Jullu 2025 (TATOLI)—Embaxadór Japaun iha Timor-Leste, Tetsuya Kimura, hasoru malu ho Xefe Kaza Sivíl Palásiu Prezidensiál Jesuína Maria Ferreira Gomes hodi hato’o agradesimentu ba Estadu Timor-Leste ne’ebé organiza ospitaliade di’ak durante vizita Vise-Ministru Parlamentár ba Negósiu Estranjeiru Japaun Ikuina Akiko iha Timor-Leste.
“Embaixadór formalmente hato’o agradesementu Governu Japaun nian ba Prezidente Repúblika, José Ramos Horta, ba susesu organizasaun no ospitalidade di’ak tebes durante vizita foin lalais ne’e hosi Vise-Ministru Parlamentár Japaun nian ba Negósiu Estranjeiru, IKUINA Akiko,” tenik iha nota ne’ebé Tatoli asesu husi media Palásiu Prezidensiál, ohin.
Vise-Ministru Parlamentár Japaun ne’e hala’o vizita loron rua (2) iha Timor-Leste hahú 24-25 fulan-jullu semana kotuk no konsidera hanesan pasu signifikativu ida hodi hametin relasaun bilaterál sira ne’ebé metin entre nasaun rua ne’e.
Embaixadór Kimura haktuir hikas, asuntu xave sira husi enkontru Vise-Ministru nian ho Prezidente Ramos-Horta ne’ebé subliña kompromisu kontinuadu Japaun nian ba dezenvolvimentu Timor-Leste nian no nia adezaun ba ASEAN.
Diskusaun produtivu sira reafirma parseria komprensivu no prepara palku ba kooperasaun iha futuru, partikularmente antes Prezidente Ramos Horta nia vizita ne’ebé marka ona ba Japaun iha fulan-Agostu 2025.
Jornalista : Hortencio Sanchez
Editór : Cancio Ximenes
