DILI, 01 Agostu 2025 (TATOLI)-Komisaun Funsaun Públika (KFP) la rejista dadus funsionáriu kazual iha sistema KFP nian, tanba ne’e responsabilidade husi liña ministeriál sira.
Komisária KFP, Anita Tavares Oliveira de Jesus, hateten iha sistema KFP rejista de’it mak funsionáriu públiku no ajente administrasaun públika sira.
Tanba ne’e, iha prosesu reforma administrasaun públika ne’ebé daudaun Komisaun hala’o hela sei haree atu organiza didi’ak, nune’e bele hatene forsa traballu hira.
“Prosesu reforma Komisaun Funsaun Públika halo hela. Ida-ne’e inklui forsa traballu, husi ne’e mak bele identifika mós númeru kazual”, nia hateten.
Komisaun Funsaun Públika rejista, iha 2024, forsa traballu iha kontestu funsaun públika no ninia karaterizasaun iha funsionáriu permanente no ajente administrasaun públika (AAP) hamutuk 39.236 (feto 14,281 (36%) no mane 24.955 (64%).
Hosi númeru ne’e, funsionáriu permanente ho totál 34.928 ne’ebé korresponde ba 89% no AAP 4.308 ka 11%.
Iha sistema SIGAP rejista mós totál númeru mensionadu tuir rejime jurídiku iha empregu mak hanesan permanente (tékniku sein kargu), nomeasaun provizóriu, kontratu serbisu ho termu sertu no kontratu provimentu ho tempu indeterminadu.
Notísia relevante: KFP aprezenta relatóriu anuál no atualiza mapa forsa traballu 2024
Jornalista: Nelson de Sousa
Editora: Maria Auxiliadora
