DILI, 04 Agostu 2025 (TATOLI)—Agênsia Nasionál Dezenvolvimentu (ADN) liuhusi Diretór Interinu, Januário Maia Guterres, hateten prosesu atu halo konstrusaun ba terminál rua ne’e AND verifika hotu ona termu referénsia no haruka ona ba Ministériu Transporte Komunikasaun (MTK).
Nia dehan, Ministrériu Transporte Komunikasaun iha planu atu halo konstrusaun ba terminál transporte públiku rua, leste no oeste, no foin lalais ne’e sira haruka ona dokumentu ba iha Agênsia Nasionál Dezenvolvimentu (AND) hodi halo verifikasaun kona-ba estudu viabilidade no dezeñu ba terminal rua ne’e.
“Termu referénsia ami verifika ona no haruka ona ba Ministériu Transporte Komunikasaun, depois sira sei haruka fali mai iha Konsellu Administrasaun Fundu Infraestrutura (KAFI) hodi kontinua ba prosesu aprovizionamentu,” nia informa ba Agência Tatoli iha nia kna’ar fatin Fatuhada, ohin.
Diretór ne’e hatutan, projetu sira-ne’e iha alokasaun ba tinan ida konserteza kata, tinan oin sira kontinua reaprópria, ne’ebé karik tinan ida-ne’e mak konsultan sira konsege finaliza ona estudu, nune’e tinan oin hahú halo dezeñu detalladu entaun 2026 sira bele implementa ona.
“Tanba ne’e, kona-ba fatin atu konstrui terminál ne’e seidauk detallu tanba sei iha hela prosesu estudu nia laran,” nia dehan.
Normalmente, konsultan sira mak sei halo didi’ak estudu ho haree fatin loloos ba konstrusaun terminál transporte públiku, tanba liuhusi estudu ne’e mak foin define looos fatin própriu ba terminál rua ne’e, se lae bainhira ita konstrui tiha mak ladi’ak sobu fila-fali ne’e estraga osan de’it.
Jornalista : Alexandra da Costa
Editór : Cancio Ximenes
