DILI, 04 Agostu 2025 (TATOLI) – Bankada Partidu Kongresu Nasionál Rekonstrusaun Timor-Leste (CNRT, iha portugés) konsidera akórdaun Tribunál Rekursu (TR) kona-ba pedidu ba fiskalizasaun abstrata husi bankada opozisaun sira ba artigu 2 husi lei númeru 4/2025, 28 Abríl, alterasaun daruak husi lei númeru 25/2021, 2 Dezembru, Lei Organizasaun Judisiária, la refere ba nomeasaun Prezidente Tribunál Rekursu, Afonso Carmona, husi Prezidente Repúblika, José Ramos Horta.
Vise-Bankada CNRT iha Parlamentu Nasionál, Patrocínio dos Reis Fernandes, hateten tuir Konstituisaun, tribunál nia desizaun ne’e mak finál no vinkula ba parte hotu tenke kumpre. Nune’e artigu 2, no artigu 76-a iha lei referida ne’ebé deklara inkonstituisionalidade ba oin labele aplika.
Nia argumenta, nu’udar lejisladór iha inísiu halo alterasaun lei ne’e atu fó solusaun ba situasaun Estadu nian, entaun tenke iha solusaun, maibé agora interpretasaun husi tribunál nian inkonstituisionalidade entaun tenke kumpre.
Nia salienta, alterasaun ba iha aditamentu artigu 76-a ne’e natureza tranzitória katak, aplika dala-ida de’it.
“Ne’ebé, ha’u haree ba artigu ida-ne’e, seja deklaradu ou la deklaradu husi tribunál, laiha efeitu, tanba atu utiliza dala-ida de’it. Prezidente Tribunál Rekursu nomeadu tiha ona, entaun sein efeitu. Tribunál deklara dehan inkonstituisional mós sein efeitu”, nia hateten.
Rekorde katak Prezidente Repúblika, José Ramos Horta, liuhusi dekretu númeru 35/2025, loron 29 fulan-Abríl, nomeia Afonso Carmona ba kargu Prezidente Tribunál Rekursu.
Nomeasaun ne’e bazeia ba lei inan artigu 86, alínea j) foti Prezidente Tribunál Supremu Justisa no fó pose ba Prezidente Tribunál Superiór Administrativu, Fiskál no Kontas nian.
“Lei Organizasaun Judisiária laiha ligasaun ho dekretu nomeasaun Prezidente Tribunál Rekursu. Nomeasaun ne’e hanesan atu polítika, ne’ebé Prezidente Repúblika nian liuhusi dekretu Prezidente”, Patrocínio salienta.
Relembra katak desizaun koletiva husi plenária Tribunál Rekursu ba inkonstitusionalidade artigu 2 husi lei númeru 4/2025, 28 Abríl, alterasaun daruak husi lei númeru 25/2021, 2 Dezembru, Lei Organizasaun Judisiária, fó sai iha loron 31 Jullu 2025 husi juis sira hanesan Duarte Tilman Soares (relatór), Jacinta Correia da Costa no António Hélder do Carmo.
Dokumentu akórdaun ho númeru 05/CONST/2025/TR, NUC: 0042/25.TRDIL, baze ba pedidu fiskalizasaun abstrata tuir konstituisaun RDTL artigu 150, alínea e) haktuir persentajen baluk-lima ida (1/5) husi númeru deputadu sira-nian.
Deputadu sira ne’ebé hato’o pedidu mak hanesan Aniceto Longuinhos Guterres Lopes, David Dias Ximenes, Maria Angelina Lopes Sarmento, Antoninho Bianco, Joaquim dos Santos, Abilio Quintão Pinto, António Moniz Clau, Veronica Fernandes, Lidia Norberta dos Santos Martins, Helena Martins Belo, Maria Ana Belo Savio, José da Cruz, Cristina Yuri dos Santos Costa, Florentino Ximenes da Costa, Mariquita Soares, Oscar Lima, Antoninho Doutel Sarmento, Sancia Florência Paixão Bano, Dário Madeira, Helder Freitas, Adolfo Martins no Abel dos Santos.
Tuir ajenda, bankada opozisaun FRETILIN no PLP iha loron 05 fulan-Agostu ne’e sei halo konferénsia imprensa ba kestaun referida.
Notísia relevante: https://tatoli.tl/2025/08/01/afonso-carmona-konsidera-akordaun-tribunal-rekursu-la-refere-ba-nomeasaun/
Jornalista: Nelson de Sousa
Editora: Maria Auxiliadora
