DILI, 05 Agostu 2025 (TATOLI)–Federasaun Futeból Timor-Leste (FFTL), Tersa ne’e, iha edifísiu FFTL, Bairros dos Grilos, asina akordu ho Liga Futeból Timor-Leste (LFTL) kona-ba apoiu finanseiru ho montante $200.000 ba LFTL hodi realiza liga nia kontinuasaun.
Apoiu finanseiru husi FFTL ba LFTL ne’e, sei halo transferénsia ba kategoria rua, transferénsia dahuluk 50% ho montante $100.000 no transferénsia daruak 50% ho montante $100.000 ne’ebé sei halo transférensia kompletu bainhira LFTL submete ona relatóriu atividade transferénsia dahuluk nian ba FFTL.
Transferénsia dahuluk ne’ebe FFTL halo ba LFTL ne’e ba kategoria tolu kompostu husi prémiu ba kampiaun, prémiu ba jogu no subsídiu ba klube.
Ho apoiu ida-ne’e, Sekretáriu Jerál FFTL, José Adilson Ribeiro hateten liga ne’ebé daudaun paradu hela sei la’o hikas iha tempu badak nia laran.
“Apoiu ba liga ne’e parte ida husi FFTL hodi tulun liga nia kontinuasaun,” Sekretariu Jerál ne’e informa.
Akordu referidu asina direta husi Sekretáriu Jerál FFTL, José Adilson Ribeiro ho Prezidente LFTL, Ipólito Soares.
Jornalista: Hortencio Sanchez
Editór: Xisto Freitas da Piedade
