DILI, 05 Agostu 2025 (TATOLI)–Prezidente Autoridade Munisípiu (PAM) Dili interinu, António Agosto Guterres, informa, Governu nomeia ona Francisco dos Santos nu’udar PAM Dili, maibé seidauk toma pose.
“Foto ne’ebé virál iha Facebook dehan PAM atuál ne’e la loos no foto ne’e antigu nian iha serimónia isar bandeira loron Restaurasaun Independénsia nasionál Timor-Leste, 20 Maiu 2025. Nomeiasaun ba nia duni mais seidauk publika naran iha Jornal Repúblika nu’udar aktu ida-ne’ebé ofisializa no bele pronunsia ba públiku,” PAM interinu hato’o ba Ajénsia TATOLI, Tersa ne’e.
Atuál Diretór Jerál Desentralizasaun Governu Lokál, dehan, daudaun ne’e seidauk hetan autorizasaun legál husi Jornal Repúblika hodi hala’o knaar hanesan PAM.
“Nomeiasaun iha ona maibé seidauk iha despasu legál no públika iha Jornál Repúblika no administrativu atu delibera. Nia seidauk halo nia serbisu hanesan PAM,” nia katak.
Notísia relevante : Gregorio Saldanha anúnsia razaun ba renúnsiu
Tuir António Agosto, bainhira iha ona publikasaun iha Jornál Repúblika mak foin iha baze legál no bele simu pose hodi halo knaar.
Antes ne’e, Gregório Saldanha hetan nomeasaun husi Primeiru-Ministru, Kay Rala Xanana Gusmão, tuir proposta Ministru Administrasaun Estatál, liuhusi despaxu n.16/GPM/II/2024, loron 28 Fevereiru, hodi troka Guilhermina F.S Ribeiro, ne’ebé okupa ona knaar ne’e desde tinan 2021.
Ministru Administrasaun Estatál, Tomás do Rosário Cabral fó pose ba Gregório da Cunha Saldanha “Mouris”, nu’udar PAM Dili iha loron 01 Marsu 2024.
Iha Janeiru 2025, Gregório Saldanha hatama karta rezignasaun no Ministru Tomás Cabral indika Diretór Jerál Desentralizasaun Governu Lokál, António Agosto Guterres, nu’udar PAM Dili interinu to’o agora.
Jornalista : Osória Marques
Editora : Julia Chatarina
