VIKEKE, 14 Agostu 2025 (TATOLI)—Selebrasaun loron Forças Armadas da Libertação Nacional Timor-Leste (FALINTIL) ba dala-50 (20 Agostu 1975-20 Agostu 2025), reprezentante Veteranu Munisípiu Vikeke, Danel Sarmento ‘Fogeti’ prefere Governu hamutuk ho Konellu Kombatente Libertasaun Nasionál (CCLN-sigla portugeza) sosializa istória FALINTIL ba jerasaun foun sira atu hatene.
“Loron FALINTIL sai loron importante ba povu Timor-Leste ne’ebé ita hanaran insurreisaun armada, tanba iha momentu ne’ebá mak ita kria forsa armada. FALINTIL ne’e forsa FRETILIN no liman-kroat povu nian hodi hasoru invzór Indonézia. Loron 20 fulan-Agustu 2025, ita komemora ba dala 50. Bá-oin ita tenke sosializa FALINTIL ninia terus no susar sira durante tinan 24 okupasaun Indonézia ba jerasaun foun sira bele hatene,” Fogeti ba TATOLI iha Postu Vikeke Vila, Kinta ne’e.
Nia dehan katak durante okupasaun Indonézia iha Timor, forsa FALINTIL ema oho, ema kaptura no balun mak rejista iha ai-laran to’o Timor-Leste hetan independénsia.
Notísia relevante: Governu aprova projetu rezolusaun ba komemorasaun aniversáriu FALINTIL da-50
“Nune’e, ami-nia hakarak ne’e jerasaun foun sira presiza hatene situasaun uluk, ne’ebé joven sira fó-aan ba luta libertasaun nasionál,” nia haktuir.
Aleinde ne’e, Fogeti informa, sobrevivente forsa FALINTIL sira-ne’ebé sei ativu ne’e presiza dignifikadu no tau sira hanesan konsilleiru ba nasaun.
Jornalista: Vitorino Lopez da Costa
Editór: Xisto Freitas da Piedade
