Hakbesik atendimentu saúde ba komunidade, MS lansa programa PIS iha suku Cunha
OEKUSI, 15 Agostu 2025 (TATOLI) – Vise-Ministru ba Fortalesimentu Institusionál Saúde, José dos Reis Magno, akompaña husi parsériu internasionál sira hamutuk ho Sekretáriu Rejionál Saúde, sesta ne’e, halo lansamentu ba Programa Integradu Saúde (PIS) iha aldeia Sonamnasi suku Cunha sub-rejiaun Pante Makasar Rejiaun Adminsitrativa Espesiál Oekusi Ambeno (RAEOA).
Parseriu internasionál sira-ne’ebé akompaña mak Organizasaun Saúde Mundiál (OMS), Fundu Dezenvolvimentu Nasaun Unida Labarik (UNICEF), Ajéonsia Internasionál Koperasaun husi Korea Súl (KOICA, sigla inglés) no Departement of Foreign Affairs and Trade (DFAT).
Notísia relevante:Saúde Oekusi klarifika kona-ba inan isin-rua ida hakotu iis iha SS Oésilo
Vise-Ministru ba Fortalesimentu Institusionál Saúde, José dos Reis Magno, konfirma, Programa Integradu Saúde ne’e, nu’udar polítika husi Ministériu Saúde atu hakbesik atendimentu saúde ba komunidade sira iha bairru, aldeia ba suku idak-idak, ne’ebé dook husi fasilidade saúde.
“Ohin ita lansa programa kuidadu saúde primaria ka Programa Saúde Integradu, nia objetivu atu mai hakbesik atendimentu saúde ba inan-aman sira iha Sonamnasi, depois programa kuidadu saúde sekundáriu mós, ami lori hotu médiku espesialista sira , ne’ebé aproveita nune’e bele hetan tratamentu ba ita-nia saúde iha loron ohin nian,” nia ko’alia iha diskursu sesaun abertura hala’o iha kapela Sonamnasi.
Notísia relevante:Bebé foin moris tenke konsumu de’it susubeen inan nian durante fulan neen
Iha fatin hanesan, Sekretáriu Rejionál ba Asuntu Saúde, Luís de Jesus Neno, hateten, katak, programa PIS ne’e hanesan uluk programa Serbisu Integradu Saúde Komunitária (SISCA), tanba programa ne’e direitamentu hakbesik fasilidade saúde ba komunidade sira iha baze.
“Tan ne’e mak atividade hotu sei hala’o iha ne’e, hahú kedas husi rejistu, tetu labarik to’o tratamentu, tanba iha mós médiku espesialista atu halo konsulta ba komunidade sira, lansamentu ne’e la’ós konsentra de’it iha aldeia Sonamnasi, maibé sei akontese iha suku hot-hotu, tanba tuir matadalan programa PIS ne’e, kada suku implementa iha fatin ida, maibé suku ne’ebé boot no luan, bele implementa iha fatin rua to’o tolu, no programa ne’e, realiza kada fulan, prioridade uluk ba fatin ne’ebé distánsia dook husi fasislidade saúde,” nia hateten.
Xefe Suku Cunha, Domingos Seco Caunan, orgullu tanba aldeia Sonamnasi, ho nia área luan no boot maibé do’ok husi fasilidade saúde, ho totál populasaun besik 200 ho populasaun 600-resin.
“Ami agradese tanba foin primeira-véz Governu mai halo lansamentu saúde iha aldeia Sonamnasi, nu’udar aldeia ne’ebé dook tebes husi fasilidade saúde, ohin ita haree molok tama to’o Sonamnasi, hakat mota rua mak foin to’o ne’ebé ami espera, ho programa ne’e, bele sai referénsia ba futuru bele konsidera atu instala mós fasilidade saúde ida,” nia orgullu.
Notísia relevante:Janeiru to’o Maiu, Saúde Oekusi rejista inan isin-rua mate iha ospitál
Observasaun jornalista Ajénsia TATOLI,I.P nota, iha ámbitu lansamentu ne’e, profisionál saúde sira, hala’o mós atividade promosaun no edukasaun saúde hanesan, nutrisaun saúde inan no oan liuliu fó susuben inan nian ba bebé, prevensaun moras dengue, prevensaun moras lepra, tuberkuloze, no moras la hada’et no moras hada’et.
Jornalista: Abílio Elo Nini
Editór: Rafael Ximenes de A. Belo
