DILI, 21 Agostu 2025 (TATOLI)—Fundu Dezenvolvimentu Kapitál Umanu (FDCH, sigla portugés) to’o tinan 2023 konsege hasai bolsa estudu 6.347 hahú husi diploma 1 to’o doutoramentu ba estudante timoroan sira.
“FDCH prodús ona ema hahú husi diploma 1 to’o doutoramentu 6.347-resin. Ida-ne’e ami satizfeitu no apresia tanba bele kontribui ba rai ida ne’e,” Diretór Ezekutivu FDCH, Júlio Aparício, informa iha salaun Ministériu Ensinu Superiór, Siénsia no Kultura (MESSK), Kolmera, Kinta ne’e.
Desde ezisténsia FDCH husi tinan 2011 to’o 2023, bolseiru 4.600 mak serbisu ona no husi ne’e 2.720 mak serbisu iha área saúde no restu iha Universidade Nasionál Timor-Leste (UNTL) no instituisaun Estadu no privadu sira.
Governu despede bolseiru 13 bá Malázia no Indonézia
Iha sorin seluk, Governu despede tan bolseiru 13 hodi bá kontinua estudu iha Malázia no Indonézia.
“Ohin ami halo despesde ba ita-nia bolseiru ba iha mestradu nian, iha área ospitalidade no turizmu bá Malázia no Indonézia. Bolsa ida-ne’e tanba serbisu hamutuk ho Ministériu Ensinu Superiór, Siénsia no Kultura, entaun prosesu hotu-hotu ita koopera ho Unidade Parseiru kooperasaun (UPC),” nia akresenta.
Notísia relevante : FDCH garante bolseiru ramata estudu sei koloka serbisu tuir área formasaun
Antes ne’e iha kaandidatu bolseiru hamutuk na’in-50 mak konkore, hafoin na’in-14 mak pasa iha teste maibé ida rezigna-an tanba probelama saúde.
“Entaun hela na’in-13 mak ohin mai despede. Ita aloka orsamentu ba ida-ne’e hamutuk $80.000,” nia katak.
Bolseiru ne’ebé mak ho kondisaun moras ne’e kompeténsia hosi UPC inklui juri sira, ne’ebé dokumentu sei entrega ba MESSK mak sei deside.
“Ida-ne’e sei atende otelária Lautein nomós ba enjeñaria Suai no Manatutu. Iha ha’u-nia mandatu tinan kotuk haruka ona bolseiru na’in 10 ba estuda iha área ospitalidade no turizmu iha Tailándia no agora servisu hamutuk ho MESSK ida-ne’e ba segundu,” nia katak.
Biban ne’e, Diretór Ezekutivu hato’o mensajen ba bolseiru sira katak, fundu ne’e povu nian, nune’e tenke ho responsabilidade, tenke estuda no aprende nune’e kuandu fila mai bele kontribui ba prosesu dezenvolvimentu nasionál.
Jornalista : Osória Marques
Editora : Julia Chatarina
