DILI, 14 Outubru 2025 (TATOLI)–Delegasaun Konferénsia Bispu Katólika Koreia Súl no Komité ba Kuidadu Pastorál Migrante, Tersa ne’e, hasoru malu ho Prezidente Repúblika (PR), José Ramos-Horta hodi aborda kooperasaun apoiu traballadór timoroan sira iha Koreia Súl.
Diretór Komité ba Kuidadu Pastorál Migrante Korea Súl, John Youn Jong Du hateten, enkontru ne’e ba dahuluk atu aprezenta sira-nia gratidaun liuhusi sakrifísiu traballadór timoroan maizumenus 7.000 ne’ebé husik hela família bá serbisu iha Koreia Súl.
“Buat ne’ebé ohin ami aprezenta mós ba Prezidente Repúblika mak kona-ba relasaun família tanba ita-nia traballadór ne’ebé bá serbisu iha Korea Súl husik hela nia fe’en, laen, entaun ami ko’alia ba Igreja Katólika Koreia nian serbisu hamutuk ho Governu Timor-Leste oinsá kria estratéjia ba traballadór serbisu iha Koreia Súl lori mós sira-nia parseiru hotu,” John Youn Jong Du hateten hafoin hasoru malu ho Prezidente Repúblika, iha Palásiu Prezidensiál Bairru-Pité.
Nia esplika, objetivu Kreda Katólika Koreia Súl maka hakarak família sira ne’ebé traballadór sira harii labele kotu, maibé armonia nafatin. Ida-ne’e planu atu halo iha futuru.
Bainhira sira hato’o planu ida-ne’e, Prezidente Repúblika mós aseita no husu ba delegasaun atu serbisu maka’as hodi bele defende direitu traballadór nian.
“Prezidente husu iha kualker tipu kria traballadór hothotu atu serbisu oinsá mós, ema-nia dignidade ne’e importante, Prezidente mós sei haka’as-an atu serbisu hamutuk ho Kreda Katólika Koreia Súl nian liuhusi amu sira bele akompaña traballadór sira hodi defende dignidade nu’udar ema,” nia akresenta.
Notísia relevante : PM husu Embaixadór dezignadu Koreia Súl fó atensaun másimu ba traballadór
Relasiona traballadór timoroan sira iha Koreia Súl ne’ebé balun sai husi sistema, Kreda Katólika Korea Súl nia parte la haree ba traballadór legál ka ilegal maibé apoiu iha parte espirituál, sosiál no seluk
“Kreda Katólika Koreia nian mós nafatin apoiu traballadór timoroan ne’ebé serbisu iha ne’ebá sai husi sistema bainhira sira moras ba ospitál laiha garantia seguransa (asuransi) selu ospitál Kreda Katólika Koreia liuhusi dioseze 16 buka ajuda nafatin sira,” John Youn Jong Du subliña.
Parte Kreda Katólika Koreia Súl ne’ebé serbisu hamutuk ho Governu Timor-Leste atu fasilita traballadór timoroan sira lori sira-nia família mak liuhusi vistu E-9.
Tuir nia, lei Korea Súl nian sira ne’ebé iha direitu atu lori família ba ne’ebá, ba de’it sira ne’ebé hetan vistu E-7, maibé sira ne’ebé E-9 labele.
Funsaun sira ba vistu E-9 maka ba traballadór sira ne’ebé la’ós profisionál iha Koreia Súl, enkuantu vistu E-7 maka ba traballadór kualifikadu sira ho abilidade espesializada ne’ebé presiza iha Koreia.
Vistu E-9 maka ba serbisu manufatura nian, enkuantu E-7 bele uza ba profisaun oioin, inklui profisionál sira, jestór sira, espesialista sira, no traballadór kualifikadu sira seluk.
Vistu E-9 ba traballadór la’ós profisionál vale ba tipu serbisu sira hanesan la’ós profisionál, liuliu iha indústria manufatura nian, ida-ne’e fó oportunidade ba traballadór estranjeiru sira atu serbisu iha Koreia Súl, normalmente iha serbisu sira ne’ebé la presiza abilidade espesializada sira.
Vistu E-7 ba traballadór kualifikadu ida-ne’e ba tipu okupasaun serbisu sira ne’ebé presiza abilidade espesializada ka profisionál, ida-ne’e fó oportunidade ba serbisu jestór sira, espesialista sira, traballadór kualifikadu jerál sira, no traballadór kualifikadu sira seluk hanesan tradutór sira no marketer estranjeiru sira.
“Entaun daudaun Kreda Katólika Korea halo hela esforsu mai hato’o ba Governu bele hato’o fali ami-nia lian ne’e ba Governu Koreia Súl atu ba oin labele vistu E-7 mak bele lori família maibé E-9 mós bele lori família hotu,” nia tenik.
Jornalista : Arminda Fonseca
Editora : Julia Chatarina
