DILI, 22 Agostu 2025 (TATOLI)—Sekretáriu Estadu Formasaun Profisionál no Empregu (SEFOPE), Rogério Araújo Mendonça, husu sentru formasaun sira-ne’ebé hetan akreditasaun no rejistadu iha SEFOPE atu investe juventude sira iha merkadu traballu liuhusi reforsa formasaun iha área oioin.
Notísia Relevante: SEFOPE iha 08 Setembru loke rekrutamentu traballadór serbisu iha Nova Zelándia
Nia hatete,n Governu tenke reforsa sentru formasaun sira liuhusi asina kontratu ho sira ho objetivu atu hasa’e kualidade ba ita-nia foinsa’e sira-ne’ebé mak atu ba servisu iha merkadu traballu iha rai laran no mós iha rai-li’ur.
Iha tinan 2012, nia dehan, SEFOPE estabelese akordu ho Governu Austrália liuhusi programa seasonal worker ne’ebé foka liu ba área agrikultura no ortikultura ho kategória unskill.
“Entaun, Governu iha polítika hodi reforsa sentru formasaun sira hodi hasa’e nivél abilidade no kompeténsia traballadór sira-nian, ne’ebé mak atu ba servisu iha Austrália, Nova-Zelandia, Corea no Japaun,” Sekretáriu Estadu ne’e informa ba jornalista sira iha salaun VIP-SEFOPE, Kaikoli, ohin.
Governante ne’e afirma, antes ne’e SEFOPE iha kategória servisu oin rua maibé agora aumenta tan ba kategória haat hanesan aged care, fábrika, peska, ospitalidade no agrikultura, ida-ne’e tamba reforsa maka’as husi sentru formasaun sira hodi bele destaka traballadór timoroan sira prienxe iha área servisu lima ne’e rasik.
“Ita haree de’it agora sentru formasaun sira-nia preparasaun ba joven sira, nune’e ami hakarak aleinde fó formasaun maibé tenke refleta mós ba merkadu traballu nian,” nia hateten.
Aleinde ne’e, ohin mós Governu liuhusi Sekretária Estadu Formasaun Profisionál no Empregu (SEFOPE) hamutuk ho halo ona lansamentu ba projetu skill up (semi-skill) hodi reforsa programa PALM, signifika ida-ne’e fó biban ba sentru formasaun sira hodi hasa’e kualidade formasaun iha área oioin.
Tamba ne’e, husu ba sentru formasaun sira tenke halo investimentu ne’ebé mak di’ak hodi bele absolve joven timoror no hamenus taxa dezempregu iha rai-laran, nune’e jere fundu Estadu nian ho dia’k tuir proposta ne’ebé iha.
Diretora Nasionál Formasaun Profisionál, Cezarina Guterres, hateten Sekretária Estadu Formasaun Profisionál durante ne’e haruka ona traballadór timoroan sira ba servisu iha rai-li’ur., entaun molok traballadór sira atu ba servisu mós presiza hatene lian inglés hodi halo komunikasaun loro-loron, tamba ne’e tenke reforsa sentru formasaun sira hodi fasilita formasaun ba joven sira-ne’ebé iha inisiativa atu ba servisu iha rai-li’ur.
Nia informa, liuliu programa Pacific Australia Labour Mobility ne’e di’ak tebes tamba bele fó oportunidade ba joven sira hodi dezenvolve sira-nia abilidade no haruka remezas ba sustentabilidade ekonómia família ida-idak nian.
“Nune’e, ohin, ita halo asina kontratu ho formasaun hitu, ne’ebé fahe ba estatutu tolu hanesan, sentru formasaun komunitáriu, rejistradu no akreditadu, husi programa rua, formasaun regulár no reforsa institusionál,” nia hateten.
Nia hatutan, iha tinan 2025, SEFOFE apoiu ona sentru formasaun hamutuk 33, kompostu husi formasaun regulár 19, formasaun movél 1, reforsa institusionál 13, ne’ebé fahe ba estatutu komunitária 15, rejistadu sia (9), akreditadu ualu (8) no totál benefisiáriu hamutuk 2.649, feto na’in-1.328 no mane na’in-1.321.
Sentru formasaun hitu ne’e kompostu husi munisípiu lima mak Manufahi, Aileu, Baukau, Oekusi no Dili, kada sentru aplika ninia tipu atividade lian inglés, lian korea, agrikultura, atualizasaun ekipamentu (aged care) no ospitalidade.
Totál fundu ne’ebé Sekretária Estadu Formasaun Profisionál no Empregu apoiu ba sentru formasaun sira-ne’e hamutuk $328,368.94, kompostu husi sentru formasaun Sharis Haburas Komunidade $6,190.00, Asosiasaun Naroman ba Futuru $9,850.00, Komoro Child & Youth Center $6,415.00, sentru formasaun BANSONE $78,018.99, INCANTO International Institute $50,721.40, sentru formasaun lian inglés Baukau $55,336.55, Cablaque Community Development Center Same $51.957.00, inklui programa estájiu espesiál $75,620.00.
Jornalista : Alexandra da Costa
Editór : Cancio Ximenes
